Што азначае надпіс крэйдай на дзвярах C + M + B?

6 студзеня католікі адзначаюць свята Богаяўлення або ўрачыстасць Трох каралёў (Трох цароў, Трох вешчуноў, Трох мудрацоў). І ў гэты дзень пасля Імшы ў касцёлах раздаюць асвечаную крэйду, якой парафіяне пішуць на дзвярах сваёй кватэры C + M + B і нумар распачатага года. Але нягледзячы на векавыя традыцыі, інтэрпрэтацыя надпіса па-ранейшаму выклікае спрэчкі.

Першая і, здавалася б, самая лагічная версія тлумачыць «загадкавыя літары» як першыя ў імёнах тых самых Трох вешчуноў, якія прыйшлі пакланіцца Дзіцятку Езусу і прынеслі Яму свае дары - Каспар, Мельхіёр і Бальтазар. Гэтыя тры каралі, чараўнікі, былі першымі паганцамі, якія знайшлі шлях да жывога Бога і прыйшлі пакланіцца Яму.

Па іншай каталіцкай традыцыі надпіс C + M + B інтэрпрэтуюць як першыя літары лацінскай фразы «Christus mansionem benedicat», што азначае «Хай дабраславіць Хрыстос гэты дом». Таксама ёсць традыцыя пісаць гэтыя літары на дзверы пасля пастырскага наведвання дома святаром («каляды»).

Улічваючы гэтыя дзве інтэрпрэтацыі, не правільна пісаць на дзвярах K + M + B, а таксама кірыліцай К + М + Б. І трэба заўважыць, што знакі «+» - гэта не «плюсікі», а «крыжыкі» - гэта значыць, знакі блаславення.

- У любым выпадку, як бы па-рознаму надпіс не інтэрпрэтаваўся, у першую чаргу ён гаворыць пра тое, што гэты дом - хрысціянскі, што ў ім ёсць людзі, якія гатовыя выконваць волю Божую, што гэты дом адкрыты для іншых - тых, каго трэба падтрымаць і словам, і справай, - тлумачыць святар. - Гэта ніякая не магія, а знешні знак вызнання нашай веры: мы ганарымся тым, што мы хрысціяне. Але не ў тым сэнсе, што я лепш за іншых, а што я член Царквы, маё жыццё належыць Госпаду, я гэтага не саромеюся і магу публічна пра гэта сказаць.

Ён дадаў, што часам суседзі не разумеюць сэнсу надпіса, могуць сціраць яго ці злавацца.

- Тады можна намаляваць літары фарбай, - жартуе святар. - Наогул для такіх выпадкаў крэйду лепш не выкідаць і захоўваць ўвесь год, каб зноўку пісаць літары. Або замест іх можна накрэсліць крыжык з нумарам года.

Дарэчы, па адной з глыбокіх хрысціянскіх традыцый менавіта на свята Богаяўлення, а не на Новы год ці нават на Раство, бацькі дораць сваім дзецям падарункі, беручы прыклад з Трох мудрацоў.