Прэзідэнт Беларусі і Папа Рымскі абмяняліся асабістымі ручкамі
- Written by katolik-gomel.by
- Published in Папа Францішак
- Add new comment
Францішак вітаў па-беларуску: "Хрыстос уваскрос!" - ФОТА
21 траўня на аўдыенцыі ў Ватыкане Папа Рымскі Францішак прыняў прэзідэнта Беларусі Аляксандра Лукашэнку. Пантыфік сустрэў прэзідэнта і яго малодшага сына Мікалая ля бібліятэкі ў залі Святых Пятра і Паўла і і прывітаў па-беларуску: "Хрыстос уваскрос!", спасылаючыся на велікодны перыяд, які зараз працягваецца ў праваслаўных. Пасля абмену прывітаннямі правёў яго ў бібліятэку. Там прайшла сустрэча, якая доўжылася каля 40 хвілін, з іх 25 хвілін - за зачыненымі дзвярыма. Прэзідэнт зноў запрасіў Папу наведаць Беларусь:
- Прыязджайце да нас. Вы атрымаеце столькі сіл і здароўя, колькі ні ў воднай кропцы свету.
Аляксандр Лукашэнка падарыў Пантыфіку копію крыжа Еўфрасінні Полацкай, які выкананы ў старажытнай беларускай тэхніцы працы па дрэве - Сожская (Гомельская) скань. Крыж ручной работы складаецца з карункаў па дрэве. Гэта старадаўняе беларускае мастацтва не так даўно было адроджана мясцовымі майстрамі. Нагадаем, абраз Панны Марыі ў тэхніцы Сожскай скані прэзідэнт нядаўна перадаваў у падарунак Папе Рымскаму.
Акрамя таго Аляксандр Лукашэнка падарыў Францішку мадэль карэты, зробленую па гэтай жа тэхналогіі і галаграфічную ікону, якая, па словах прэзідэнта, «злучае гісторыю і сучаснасць», паведамляецца ў прэсе.
Апрача “афіцыйных” Аляксандр Лукашэнка зрабіў вельмі асабісты падарунак - сваю ручку, якой карыстаўся доўгі час. Ён прызнаўся, што робіць такі жэст упершыню ў жыцці, падкрэсліваючы выключнасць асобы Папы.
Францішак падарыў Прэзідэнту Беларусі бронзавы сувернірны медаль з выявай аліўкавага дрэва, якое з’яўляецца сімвалам міру, і экзэмпляры трох сваіх дакументаў: энцыклік “Lumen Fidei” і “Laudato si'”, а таксама Апостальскай адгартацыі “Amoris Laetitia”. “Асабісты” падарунак ад Святога Айца таксама не прымусіў чакаць сябе - Аляксандр Лукашэнка атрымаў асабістую ручку Францішка, адзначае be.radiovaticana.va.
- Я выказаў думку, што Пантыфіку пара прыехаць у Беларусь і разам з нашым Патрыярхам (Маскоўскім і ўсяе Русі Кірылам - рэд.) Сустрэцца з нашымі жыхарамі. Упэўнены, што там будзе не адзін мільён чалавек, якія б хацелі бачыць гэты поціск рукі не ў далёкай Кубе ў аэрапорце, а на зямлі, якая знаходзіцца ў цэнтры Еўропы, - сказаў пасля сустрэчы Аляксандр Лукашэнка.
Прэзідэнт Беларусі таксама сустрэўся з Дзяржаўным сакратаром Ватыкана П'етра Паралінам, які наведваў краіну ў 2015 годзе, і пабываў на выставе «Іканапіс Беларусі XVII-XXI», якая адкрылася ў Ватыканскім музеі.
Рыма-каталіцкая царква ў Беларусі налічвае амаль 1,5 млн. вернікаў (каля 15% насельніцтва краіны) і складаецца з чатырох дыяцэзій, якія аб'ядноўваюць 493 парафіі. Дзейнічае 5 духоўных навучальных устаноў, 11 місій і 9 манастыроў. У Беларусі дзейнічаюць 491 касцёл, яшчэ 37 каталіцкіх святыняў знаходзяцца ў стадыі будаўніцтва.
Фота: facebook.com/vaticanradio.by/
Related items
- Загадкі Каралевы Беларусі: уратавала ад маскоўскай акупацыі, знікла і зноў аб'явілася
- Мілыя фота з жывёламі ў Баранавічах выклалі манаскія асобы
- Пасля сутак на мяжы кіроўцу не ўпусцілі ў Беларусь з Польшчы. Прычына небанальная
- Адпраўка ў войска ў Беларусі адбываецца з удзелам святароў
- Пацалунак пад абразом і цягнік з адным вагонам – чым дзеліцца парафія ў глыбінцы