85 сланечнікаў. Хто і як павіншаваў Папу Францішка з Днём нараджэння

У сваіх віншаваннях Папы Рымскага Францішка з ягоным 85-годдзем 17 снежня каталіцкія біскупы Беларусі выказалі ўдзячнасць за памяць і малітву ў інтэнцыі Касцёла ў Беларусі і ўсёй краіны, "якая перажывае не самыя спакойныя часы сваёй гісторыі". А таксама перадалі "глыбокае прагненне" вітаць Пантыфіка на беларускай зямлі.

"Дзякуючы Усемагутнаму Богу Вы ўсім сваім жыццём даяце яскравы прыклад бескарыснага і беззаганнага служэння Хрысту і Яго Святому Касцёлу, - цытуе Сatholic.by віншаванне старшыні Канферэнцыі Каталіцкіх Біскупаў Беларусі біскупа Алега Буткевіча. - Гледзячы на Ваша шматгадовае служэнне як святара, пазней як біскупа, і цяпер, як наступніка святога Пятра, з упэўненасцю можна пераканацца ў Вашай непахіснай адданасці Касцёлу, гатоўнасці аддаць усе сілы і здольнасці дзеля ажыццяўлення яго выратавальнай місіі.

Беларускія біскупы пажадалі Францішку Божага бласлаўлення, штодзённай апекі Маці Божай, і каб Езус Хрыстус "умацоўваў у кожнай справе і добрым слове".

Стала вядома, як Пантыфік адзначыў Дзень нараджэння. Раніцай Святы Айцец прыйшоў у Залу Паўла VI, каб паслухаць адвэнтавыя разважанні Прапаведніка Папскага дома. Да яго падышлі тры чалавекі, якія знаходзяцца пад апекай Апостальскай элемазінарыі (структура, якая клапоціцца пра бедных). Бяздомныя выказалі свае пажаданні і ўручылі 85 сланечнікаў - як знак таго, каб Францішак "накіроўваў сваё жыццё да Госпада".

Затым Пантыфіка павіншаваў дэкан Калегіі кардыналаў. Пасля ўступнай малітвы ўсе сабраныя ў залі папскія супрацоўнікі апладзіравалі яму. Таксама Францішка павіншавала група мігрантаў, якія прыбылі ў Італію дзякуючы пагадненню паміж Святым Пасадам, італьянскімі і кіпрскімі ўладамі. Папе ўручылі падарунак - карціну афганскага бежанца, якая паказвае спробу перасекчы Міжземнае мора некаторымі мігрантамі.