Logo
Print this page

Жоўта-блакітны голуб міру: апублікаваны лагатып паездкі Папы ў Казахстан

Францішак наведае НурСултан, дзе прыме ўдзел у Кангрэсе лідэраў сусветных рэлігій

23 жніўня 2022 года Святы Пасад апублікаваў лагатып папскага падарожжа ў Казахстан. 13-15 верасня 2022 года Францішак наведае Нур-Султан, дзе прыме ўдзел у кангрэсе лідараў сусветных рэлігій.

“На лагатыпе змешчаны голуб з аліўкавай галінкай. Крылы намаляваны ў выглядзе двух складзеных рук, якія сімвалізуюць крылы пасланнікаў міру і адзінства. Сэрца ўнутры крылаў сімвалізуе любоў, плён узаемаразумення, супрацоўніцтва і дыялогу. Аліўкавая галінка стылізавана традыцыйным казахскім арнаментам”, - тлумачыцца ў паведамленні Святога Пасаду, якое цытуе vaticannews.va/be.

На заднім плане ў лагатыпе змешчаны светла-блакітны шанырак – канструктыўны элемент у выглядзе рашэцістай крыжавіны, які ўвенчвае купал юрты, традыцыйнага жылля казахскага народа, а ўнутры выявы – жоўты крыж.

Выкарыстаныя колеры – светла-блакітны і жоўты, такія ж, як і на сцягу Казахстана; а таксама жоўты і белы – як на сцягу Ватыкана.

Дэвіз папскай пілігрымкі: "Пасланнікі міру і адзінства" напісаны ўверсе на казахскай, а ўнізе – на рускай мовах.

У сталіцы Казахстана запланаваны сустрэчы Пантыфіка з прэзідэнтам, прадстаўнікамі ўлады і дыпламатычнага корпуса. Ён прыме ўдзел у VII З’ездзе лідараў сусветных і традыцыйных рэлігій і выступіць там з прамовай. Пройдуць прыватныя сустрэчы Папы з некаторымі рэлігійнымі лідарамі. Апрача таго, Францішак узначаліць святую Імшу для каталіцкіх вернікаў на Плошчы Expo і сустрэнецца з мясцовымі біскупамі, святарамі, дыяканамі, кансэкраванымі асобамі, семінарыстамі і душпастырскімі супрацоўнікамі.

FaLang translation system by Faboba
Template Design © Joomla Templates | GavickPro. All rights reserved.