У Беларусі развіталіся з Народным паэтам Нілам Гілевічам
- Written by katolik-gomel.by
- Published in Соцыум
- Add new comment
Яго вершы друкаваліся ў каталіцкім часопісе [+ВІДЭА хітоў]
1 красавіка на Кальварыйскіх могілках у Мінску пахавалі Народнага паэта Беларусі Ніла Сымонавіча Гілевіча, які адышоў у вечнасць 29 сакавіка на 85-м годзе жыцця. Развітанне з паэтам і памінальную паніхіду правялі ў праваслаўным Свята-Петра-Паўлаўскім саборы Мінска на Нямізе, паведамляе Саюз беларускіх пісьменнікаў.
Развітацца з апошнім Народным паэтам Беларусі (з 1992 года гэтае званне нікому не прысуджаецца) прыйшлі тысячы чалавек, сярод іх - былы кіраўнік краіны Станіслаў Шушкевіч, цяперашні міністр культуры Барыс Святлоў, пісьменнік Віктар Казько, старшыня "Таварыства беларускай мовы" Алег Трусаў, навуковая і літаратурная інтэлігенцыя, дыпламаты, палітыкі, простыя людзі.
Ніл Гілевіч нарадзіўся 30.09.1931 г. у вёсцы Слабада Лагойскага раёна Мінскай вобласці ў сялянскай сям'і. У савецкі час працаваў у Беларускім дзяржаўным ўніверсітэце, газеце «Звязда», Саюзе пісьменнікаў БССР. З 1989 г. - старшыня рэспубліканскага Таварыства беларускай мовы імя Ф.Скарыны. Таксама быў народным дэпутатам БССР. Упершыню ў друку з вершамі выступіў у 1946 г. Укладальнік і навуковы рэдактар фальклорных зборнікаў «Песні сямі вёсак» (1973), «Песні народных свят і абрадаў» (1974), «Лірычныя песні» (1976), «Лірыка беларускага вяселля» (1979), «Народныя казкі, байкі, апавяданні і мудраслоўі» (1983). Працаваў таксама ў галіне перакладу. Лаўрэат Дзяржаўнай прэміі БССР імя Янкі Купалы (1980) за кнігу паэзіі «У добрай згодзе» і перакладчыцкую дзейнасць.
Ніл Гілевіч - аўтар тэкстаў такіх беларускіх хітоў як «Вы шуміце, бярозы»:
Вы шуміце, шуміце нада мною, бярозы,
Калышыце, люляйце свой напеў векавы,
А я лягу-прылягу край гасцінца старога
На духмяным пракосе недаспелай травы.
Любоў да роднага краю - вызначальная характарыстыка паэзіі Гілевіча. Стаў шырока вядомым ягоны верш «І усё ж мы дойдзем, дойдзем мы да Беларусі»:
…Равуць вятры, грымяць грамы,
Пыл засціць вочы нам, і ўсё ж,
I ўсё ж мы дойдзем, дойдзем мы
Да Беларусі!..
У апошнія гады вершы Ніла Гілевіча часта друкаваліся ў каталіцкім часопісе «Наша вера», а ў выдавецтве Pro Christo Мінска-Магілёўскай архідыяцэзіі Каталіцкай царквы ў Беларусі выходзілі кнігі народнага паэта. Дарэчы, у 2011 годзе ў Чырвоным касцёле Мінска ладзілі адмысловую імшу з нагоды 80-годдзя Ніла Гілевіча.
І я жыву...
Жыву таму, што знаю:
Усе мае грахі перад табой
Перамагла і на парозе раю
Не ўспомніла пра іх твая любоў.
Media
Related items
- Такі падарунак – толькі ад байкераў. Мотасезон яны адкрылі ў касцёле
- Ці ўступаць у піянеры, спыталі ў вернікаў – частка адказаў здзівіла
- Пасля сутак на мяжы кіроўцу не ўпусцілі ў Беларусь з Польшчы. Прычына небанальная
- Адпраўка ў войска ў Беларусі адбываецца з удзелам святароў
- Загадкавую смерць манахіні расследуюць у Гомелі