Мітрапаліт Кандрусевіч заступіўся за Вайсковыя могілкі ў Мінску
- Written by Katolik.life
- Published in Соцыум
- Add new comment
Арцыбіскуп: «Пры так званым «ўпарадкаванні» некропалю мы становімся сведкамі негатыўных адносін да нацыянальнай гісторыі».
Старшыня Канферэнцыі Каталіцкіх Біскупаў у Беларусі Мітрапаліт Тадэвуш Кандрусевіч звярнуўся да дзяржаўных уладаў краіны і грамадскіх арганізацый у сувязі з сітуацыяй з Вайсковымі могілкамі ў Мінску. Арцыбіскуп адзначыў, што пры так званым «ўпарадкаванні» некропалю, які з'яўляецца гісторыка-культурнай каштоўнасцю Беларусі, мы становімся сведкамі негатыўных адносін да нацыянальнай гісторыі.
- Ніхто не супярэчыць таму, што час ад часу неабходна ўпарадкоўваць могілкі, падобна таму, як мы робім рамонт дарог, дамоў і г.д. Аднак упарадкаванне могілак не павінна скажаць гісторыі. На надмагільных помніках знаходзяцца імёны пахаваных, гады іх жыцця, нярэдка іх род дзейнасці. На іх мы таксама бачым знакі іх рэлігійнай прыналежнасці, - цытуе арцыбіскупа афіцыйны сайт Каталіцкай царквы ў Беларусі Catholic.by.
Тадэвуш Кандрусевіч падкрэсливае, што ўпарадкаванне, якое распачалося на Вайсковых могілках, часта звязана са знішчэннем помнікаў і надмагільных крыжоў.
- Такі падыход да справы нішчыць аўтэнтычнасць могілак як гісторыка-культурнай і рэлігійнай каштоўнасці. Знікненне з іх крыжоў сведчыць пра спіхванне хрысціянства - традыцыйнай рэлігіі нашай Бацькаўшчыны - на перыферыю жыцця, - непакоіцца старшыня Канферэнцыі каталіцкіх біскупаў Беларусі.
Ён звяртаецца з заклікам зрабіць усё магчымае, каб захаваць гістарычную каштоўнасць Вайсковых могілак, не дапусціць у будучым спусташэння святых месцаў, якімі з’яўляюцца месцы пахавання памерлых, і захаваць нацыянальную гісторыю.
Related items
- Прыехалі ў касцёл на трох машынах: на Віцебшчыне затрымалі двух святароў
- Teresa & Maria: у фінал Еўрабачання выйшла Украіна з песняй з хрысціянскім кантэкстам
- Ці ўступаць у піянеры, спыталі ў вернікаў – частка адказаў здзівіла
- Не святар: разабралі памылковую інфармацыю пра затрыманне верніка ў Омску
- Пасля сутак на мяжы кіроўцу не ўпусцілі ў Беларусь з Польшчы. Прычына небанальная