Прыехалі ў касцёл на трох машынах: на Віцебшчыне затрымалі двух святароў
- Written by KATOLIK.LIFE
- Published in Соцыум
- Add new comment
Даведаліся пра абставіны затрымання святароў, якія служаць у санктуарыі ў Шуміліне: яны за кратамі, іх чакае суд.
Парафія Маці Божай Фацімскай у мястэчку Шуміліна ў Віцебскай вобласці засталася без святароў ва ўрачыстасць Унебаўшэсця Пана, якую католікі адзначаюць 9 траўня. Напярэдадні, 8 траўня, былі затрыманыя міліцыяй айцец Анджэй Юхневіч і айцец Павел Лемех з ордэну місіянераў аблатаў Беззаганнай Марыі, якія служаць у дыяцэзіянальным санктуарыі ў Шуміліне.
Як распавялі Katolik.life вернікі, гэта здарылася пасля таго, як у мястэчку прайшла сустрэча святароў і кансэкраваных асобаў Віцебскай дыяцэзіі:
«Калі ўсе раз'ехаліся, у касцёл прыбылі тры машыны з міліцыяй, усе былі ў цывільным. Агледзелі памяшканні і забралі айца Паўла. У той жа час айца Анджэя затрымалі ў дарозе – ён ехаў на сустрэчу».
Святароў адвезлі ў ізалятар у Віцебск, чакаецца, што суд над імі адбудзецца 10 траўня. Гэта азначае, што іх абвінавачваюць па адміністрацыйным артыкуле. У раскладзе суда пакуль няма справы святароў, таму абвінавачванне невядомае.
Верагодна, гаворка ідзе пра дзеянні ў інтэрнэце, за якія ў апошнія гады масава судзяць жыхароў Беларусі: падпіскі на выданні, абвешчаныя экстрэмісцкімі, рэпосты, каментары, сімволіка на аватарках.
Мінімум двое сутак, да суда, святары правядуць за кратамі. Звычайна абвінавачаных па падобных артыкулах трымаюць у асабліва цяжкіх умовах: без матраца, у перапоўненых камерах, даюць вельмі сціплую ежу.
Аднак святарам пагражае і больш працяглае зняволенне: адміністрацыйны арышт. Іншае пакаранне прадугледжвае буйны штраф.
Абодва затрыманыя – грамадзяне Беларусі. Гэта далёка не першыя каталіцкія святары, якіх затрымлівалі і судзілі па адміністрацыйных артыкулах за дзеянні ў інтэрнэце. Найбольш такіх выпадкаў было менавіта на Віцебшчыне.
Наш канал в Telegram – только интересное и важное. Подписаться >
Related items
- «Трымаецца, не скардзіцца, просіць аб малітве». Святар з Валожына – паўгода ў зняволенні
- У Беларусі прызнаны гісторыка-культурнай каштоўнасцю каталіцкі абрад «Тры каралі»
- Старадаўняя капліца згарэла на могілках у Смаргоні
- «Не сказалі нават біскупу». Даведаліся, на які тэрмін асудзілі святароў у Віцебску
- Песня з хрысціянскімі матывамі ад Украіны заняла трэцяе месца на Еўрабачанні