У «Славянскім Базары у Віцебску» удзельнічае каталіцкая моладзь
- Written by katolik-gomel.by
- Published in Царква
- Add new comment
Удзел у свецкім фестывалі - магчымасць распавесці пра Хрыста.
Моладзь з душпастырства студэнтаў «Разам» пры парафіі св. Барбары ў Віцебску прымае ўдзел у фэсце вулічнага мастацтва «На сямі вятрах» 14-15 ліпеня ў рамках правядзення фестывалю «Славянскі базар».
«Разам» — гэта каталіцкая група маладых людзей. У асноўным гэта студэнты. У калектыў уваходзяць усе жадаючыя, якія хочуць дарыць іншым людзям радасць, дабрыню і спакой. Душпастырства налічвае 40 студэнтаў, якія пастаянна ўдзельнічаюць у агульных сустрэчах, якія адбываюцца кожны чацвер на розныя тэмы, вечарынах, евангелізацыйных курсах, музычным «Talitha kum» і тэатральным гуртах.
Як адзначыў для “Каталіцкага Весніка” душпастыр віцебскіх студэнтаў а. Тамаш Міка ОР, ідэя заснавання душпастырства нарадзілася каля 1,5 гады таму. Потым ажыццявілася дзякуючы супольнасці Яна Хрысціцеля з Польшчы і іх тэатральнай майстэрні, у якой моладзь з Беларусі змагла прыняць удзел. Затым адбылося знаёмства з Уладай Цвікі, якая бясплатна дапамагала на працягу трох месяцаў рыхтаваць тэатральную пастанову. Дзякуючы ёй была магчымасць прадставіць 30 мая 2015 года пантаміму на 28 хвілін «Забудзь» у Малой зале КЗ «Віцебск», дзе ўсе глядацкія месцы былі запоўненыя.
На пытанне “Як узнікла ідэя прыняць удзел у фестывалі?”, святар адказаў, што запрасіла менавіта Улада Цвікі, бо яна з’яўляецца адным з арганізатараў гэтага фэсту. “Улада займалася з нашай моладдзю падчас падрыхтоўкі пантамімы ў мінулым годзе, прысутнічала на рэпетыцыі перад канцэртам, які адбыўся 20 мая бягучага году ў КЗ «Віцебск» з нагоды 800-годдзя ордэна дамініканаў”, — падкрэсліў святар.
“Звычайна мы ладзім пастаноўкі, канцэрты, флэшмобы для студэнтаў, з мэтай евангелізаваць моладзь і старэйшых за межамі сцен святыні. Маладыя людзі, якія сярод нас, яны не толькі хочуць прымаць, але аддаваць і дзяліцца з іншымі. «На сямі вятрах» — гэта першы фестываль, у якім калектыў «Разам» возьме ўдзел. Моладзь мае магчымасць зрабіць штосьці для Езуса за межамі касцёла, расказаць пра Яго ў больш лёгкі для сябе спосаб. Менавіта такая справа апостальства ўсю моладзь з душпастырства “Разам” разам і аб’ядноўвае. Выхад у свет да людзей – гэта “зерне, якое сейбіт кідае”, а потым ужо справа Госпада як узрасціць яго.
Удзел у такім свецкім фэсце – гэта не проста ідэя менавіта моладзі з касцёла св. Барбары ў Віцебску, гэта “евангелізацыя” — пасланне ад усяго Каталіцкага Касцёла. Другі Ватыканскі Сабор заклікае вернікаў уключыцца ў евангелізацыю”, — дадаў апякун душпастырства.
Айцец Тамаш Міка ОР разам з моладдзю будзе прымаць удзел у фэсце вулічнага мастацтва «На сямі вятрах», а менавіта ў вулічным перформансе, на які ўсіх запрашае.
14-15 ліпеня, 18.00-19.00 — музычны гурт «Talitha kum» будзе выконваць песні праслаўлення (пляцоўка каля лесвіцы Цэнтра сучаснага мастацтва па вул. Талстога, 7);
14-15 ліпеня, 15.00-17.00 – вулічны перформанс «Вольнае дзяцінства» (пляцоўка перад Пушкінскім мастом з правага боку).
Related items
- З паходнямі і ў касцюмах: вуліцамі гарадоў Беларусі правялі Крыжовы шлях
- Месяцовае і сонечнае гало назіралі беларусы ў Вялікі тыдзень
- Аксана, Сяргей, Паліна, Павел... За тых, хто не сустрэне Вялікдзень дома, моляцца ў Вялікі чацвер
- Дзе глядзець відэа-онлайн на Вялікдзень-2024 – падборка прамых трансляцый з касцёлаў
- Упершыню за пяць гадоў Крыжовы шлях прайшоў у цэнтры Гродна і сабраў сотні ўдзельнікаў