«За тых, хто церпіць пераслед». Біскуп Касабуцкі - аб тым, як правесці Вялікі пост
- Written by KATOLIK.LIFE
- Published in Царква
- Add new comment
А вядомыя хрысціяне краіны заклікалі да агульнанацыянальнай малітвы за Беларусь
У Папялец, 17 лютага, біскуп Юры Касабуцкі апублікаваў свае разважанні на Вялікі пост, які пачаўся ў католікаў.
- Абрад пасыпання попелам на пачатку гэтага літургічнага перыяду нагадвае нам аб тым, што жыццё чалавека на гэтым свеце часовае і хутка прамінае. «Памятай, што ты - прах і ў прах вяртаешся», - кажа святар, пасыпаючы сімвалічна попел на нашыя галовы. Гэтыя словы заахвочваюць нас звярнуць увагу на справы вечнага жыцця і духоўныя каштоўнасці, якія нярэдка ў штодзённым жыцці пад уплывам шматлікіх справаў, заняткаў, перажыванняў і клопатаў мы забываем.
Біскуп нагадаў, што «Кайцеся і верце ў Евангелле», - так гучыць другая форма словаў пры пасыпанні попелам.
- Гэта ўжо заклік знайсці адпаведны час, каб зрабіць рахунак сумлення, задумацца над сваім жыццём, сваімі ўчынкамі, адказаць самому сабе на пытанне, што ў маім жыцці было дрэнным, якія я раблю памылкі, можа я кагосці пакрыўдзіў і т.п., зразумець сваю слабасць і ўсведаміць сабе свае грахі. Пакаянне з’яўляецца неад’емнай часткай жыцця хрысціяніна, бо гэта крок да працы над сабой, якая вядзе да дасканаласці.
Другая частка заахвочвае нас умацоўваць нашу веру, нашу сувязь з Богам, дадаў іерарх. Гэтаму паспрыяе большая колькасць часу, які мы прысвяцім малітве і духоўным практыкам, чытанню Бібліі і іншай духоўнай літаратуры, часцейшае наведванне кацёла для асабістай малітвы і для ўдзелу ў спецыяльных набажэнствах (Крыжовы шлях, Песні жальбы).
- Час Вялікага посту павінен паспрыяць нашаму духоўнаму росту, зрабіць нас хоць трошкі лепшымі. Гэта час пэўнага змагання са сваімі недахопамі і слабасцямі, якое бывае нялёгкім, але калі мы зможам асягнуць хоць маленькую перамогу і стаць хоць трошкі ў чымсці лепшымі, то мэта будзе асягнута, і мы зробім крок наперад.
Мэта пастановаў, якія вернік робіць на пачатку посту, - наблізіцца да Бога і зрабіцца трошкі лепшымі:
- З гэтымі пастановамі мы злучаем пэўныя абмежаванні (устрымліваемся ад гучных вясёлых забаваў, паводле магчымасці і стану здароўя робім абмежаванні ў ежы і інш.). Без малітвы і духоўных практык, без працы над сабой, без учынкаў міласэрнасці гэтыя абмежаванні маюць невялікі сэнс. Напрыклад, абмежаванне ў ежы можа быць звычайнай дыетай, якая трошкі аздаравіць нашае цела, але для духоўнага жыцця не прынясе карысці.
Асабліва падчас Вялікага посту біскуп Юры Касабуцкі заахвоціў маліцца за Бацькаўшчыну і за народ, ахвяраваць свае велікапосныя практыкі і малітвы за тых, хто церпіць пераслед і каму найбольш патрэбная Божая дапамога.
Таксама 17 лютага вядомыя хрысціяне краіны апублікавалі сумеснае відэа з заклікам да агульнанацыянальнай малітвы за Беларусь:
- Давайце аб’яднаемся ў малітве кожны дзень а 21-ай гадзіне, а таксама будзем маліцца за Беларусь на багаслужэннях, асабліва ў пятніцу вечарам. Мы хочам, каб гэты час стаў часам агульнанацыянальнай малітвы за Беларусь.
Media
Related items
- Мілыя фота з жывёламі ў Баранавічах выклалі манаскія асобы
- Пасля сутак на мяжы кіроўцу не ўпусцілі ў Беларусь з Польшчы. Прычына небанальная
- Адпраўка ў войска ў Беларусі адбываецца з удзелам святароў
- Пацалунак пад абразом і цягнік з адным вагонам – чым дзеліцца парафія ў глыбінцы
- Загадкавую смерць манахіні расследуюць у Гомелі