У Будславе пачынаюцца працы па аднаўленні Нацыянальнага санктуарыя

У Будславе Мядзельскага раёна завяршаюцца падрыхтоўчыя работы ля будынка пашкоджанага пажарам каталіцкага Нацыянальнага санктуарыя. Выкладзеныя дарожныя пліты, прыбыла першая партыя металу, падрыхтаваная пляцоўка для крана. У найбліжэйшыя дні чакаецца прыбыццё будаўнічых лясоў і ўстаноўка вежавага крана.

У пашпарце аб'екта, які з'явіўся каля касцёла, пазначана, што работы павінны завяршыцца 30 верасня 2021 года.

Аднаўленнем храма займаецца арганізацыя "Прамтэхмантаж". Згодна з пашпартам, "рамонтна-будаўнічыя мерапрыемствы" будуць уключаць аднаўленне, паляпшэнне, а таксама замену асобных канструкцый, дэталяў і інжынерна-тэхнічнага абсталявання. Нагадаем, галоўнае, што трэба зрабіць - умацаваць купал і ўзвесці новы дах святыні.