І ў дождж, і ў снег. Больш за год трывае ініцыятыва «Ружанцовы шпацыр за Беларусь»
- Written by KATOLIK.LIFE
- Published in Царква
- Add new comment
«Заўсёды ёсць спакуса спыніць малітву, але разумеем, што трэба працягваць трываць, захоўваць рэгулярнасць у гэтай справе»
Кожную нядзелю група каталіцкіх вернікаў у Мінску шпацыруе з Ружанцам і малітвай за Беларусь - ад Чырвонага касцёла (парафіі св. Сымона і св. Алены) да катэдры Найсвяцейшага Імя Марыі. Гэта прыватная ініцыятыва бесперапынна ладзіцца з 9 верасня 2020 года. Пра малітоўную акцыю Katolik.life распавяла ініцыятар і натхняльнік «Ружанцовага шпацыра за Беларусь» Юлія Фралова:
- Калі не ўпусцілі ў краіну арцыбіскупа Тадэвуша Кандрусевіча, захацелася адказаць на гэта малітоўнай ініцыятывай. Пасля св. Імшы ў Чырвоным касцёле прапанавала вернікам, якія адчуваюць такую патрэбу, выйсці разам - памаліцца за Беларусь і за вяртанне арцыбіскупа, ідучы праз цэнтр Мінска з Ружанцам. Некаторыя адгукнуліся, у выніку утварылася група вернікаў - каля дзесяці чалавек. Найбольшая колькасць, якая была, - звыш 20 вернікаў. І з 9 верасня па 24 снежня 2020 года такія Ружанцовыя шпацыры адбываліся штодня.
Пасля таго, як арцыбіскуп Тадэвуш Кандрусевіч змог вярнуцца на Радзіму, малітоўны шпацыр вырашылі ладзіць раз на тыдзень - па нядзелях па заканчэнні вечаровай св. Імшы ў Чырвоным касцёле. Пасля ружанцовай малітвы вернікі чытаюць «Літанію нашых дзён» паводле благаслаўлёнага Ежы Папялушкі. Завяршаецца Ружанцовы шпацыр спевам-малітвай «Магутны Божа».
- Ладзім шпацыр пры любым надвор'і - і ў дождж, і ў снег. Таму бывала, што моклі і мерзлі, - прызнаецца пані Юлія. - Заўсёды ёсць спакуса спыніць малітву, але разумеем, што трэба працягваць трываць, захоўваць рэгулярнасць у гэтай справе.
Ініцыятар малітоўнай акцыі падкрэслівае, што ёсць людзі, на якіх трымаецца Ружанцовы шпацыр, - у прыватнасці, гэта спадарыня Марыя. Цяпер не так шмат людзей далучаюцца да жанчын. Частцы былых удзельнікаў давялося з'ехаць за мяжу. Вернікі запрашаюць усіх жадаючых далучацца і арганізоўваць падобныя малітвы ў іншых гарадах.
Related items
- З паходнямі і ў касцюмах: вуліцамі гарадоў Беларусі правялі Крыжовы шлях
- Дзе глядзець відэа-онлайн на Вялікдзень-2024 – падборка прамых трансляцый з касцёлаў
- Абяцаныя працы не пачаліся. Паўтара гады, як зачынены Чырвоны касцёл у Мінску
- Упершыню за пяць гадоў Крыжовы шлях прайшоў у цэнтры Гродна і сабраў сотні ўдзельнікаў
- Штосьці незвычайнае зладзілі ў мінскім касцёле: набажэнства спалучылі з перфомансам