«Мы адмаўляемся выносіць рэчы». Парафія Чырвонага касцёла выступіла з заявай
- Written by KATOLIK.LIFE
- Published in Царква
- Add new comment
Там патлумачылі прычыны, апісалі цяперашнюю сітуацыю і пракаментавалі «канструктыўны дыялог» з уладамі
Каталіцкая парафія святога Сымона і святой Алены ў Мінску паведаміла 20 кастрычніка пра пасяджэнне касцёльнага камітэта, па выніках якога апублікавала заяву адносна сітуацыі з закрыццём Чырвонага касцёла.
«Касцёльны камітэт катэгарычна не згодны з пастаноўкай пытання аб раптоўным скасаванні дамовы арэнды. Парафію прымушаюць імгненна вызваліць памяшканне касцела і плябаніі, на што парафія не мае ні фізічных, ні юрыдычных, ні матэрыяльных сродкаў. Адсутнасць магчымасці працаваць з дакументацыяй паралізавала юрыдычную і фінансавую дзейнасць парафіі. Нам таксама не прадстаўлены і акт агляду памяшканняў комплекса будынкаў Чырвонага касцёла», – гаворыцца ў паведамленні.
Таксама адзначаецца, што падрыхтоўкай касцёла да асення-зімовага перыяду займаецца КУП “Мінская спадчына”, якая адказвае, у тым ліку, за спраўнасць ліній электрасетак і электраабсталявання: «Таму мы не згодны з абвінавачаннем парафіі ў меркаванай прычыне ўзгарання: “парушэнне правіл эксплуатацыі электрасетак і электраабсталявання”. Узгаранне адбылося ноччу, калі нагрузка на электрасеткі была мінімальная».
«Паколькі да гэтага дня ні прадстаўнікам касцёльнага камітэта, ні святарам, якія служаць у касцеле, ні біскупам, ні нават Мітрапаліту не была дадзена магчымасць убачыць сваімі вачыма пашкоджанні і пераканацца ў аварыйным стане касцёла (а ўзгаранне пацверджана толькі ў прыбудове да касцёла), то мы адмаўляемся выносіць рэчы з касцёла, бо лічым гэта беспадстаўным і немагчымым з вышэй азначанай прычыны. Тое, што прадстаўнікам парафіі забаронены ўваход у касцёл, а супрацоўнікам КУП “Мінская спадчына” і іншых арганізацый ён не абмежаваны, выклікае недавер і падазронасць», – заявілі ў парафіі.
Там дадалі, што да гэтага часу не атрымалі адказ на пытанне ці быў складзены акт апісання касцёльнай маёмасці, якая знаходзіцца ўнутры будынка, не паведамлена, якая ўстанова і у чыёй асобе нясе адказнасць за яе захаванне і таксама за грашовыя ахвяраванні вернікаў, якія знаходзяцца ўнутры будынка, не прадставілі дакументы, на падставе якіх для парафіі абмежаваны доступ у касцёл.
«Парафія засталася сам на сам з пагрозай страты касцельных каштоўнасцяў, а менавіта культавых рэчаў, архіваў, бібліятэкі, прыстасаванняў і механізмаў патрэбных пры ажыццяўленні штодзеннай дзейнасці касцёла. Таму мы не згодны, што на сустрэчы прадстаўнікоў Касцёла з прадстаўнікамі ўлады ў Мінгарвыканкаме атрымаўся “канструктыўны дыялог”», – падкрэслілі ў парафіі.
Касцёльны камітэт прапануе зрабіць патрэбны рамонт за кошт парафіі без прыцягнення бюджэтных сродкаў у найхутчэйшы тэрмін і хадайнічае аб перадачы будынка касцёла на баланс парафіі. А ад вернікаў просіць падтрымкі і малітвы.
Related items
- Не святар: разабралі памылковую інфармацыю пра затрыманне верніка ў Омску
- Адпраўка ў войска ў Беларусі адбываецца з удзелам святароў
- «У парафіі 15-20 асоб». Мітрапаліт абвясціў акцыю па падтрымцы Касцёла на Магілёўшчыне
- Беларусы даказваюць у судах «польскія карані» – з дапамогай веры
- На «гучныя» службы ў касцёле паскардзіўся жыхар Смаргоні. Што яму адказалі?