У мінскім касцёле Святога Роха тэрмінова мяняюць дах

Гістарычны будынак касцёла на Залатой Горцы ў Мінску не разбіраюць і ня зносяць. Пробашч рыма-каталіцкай парафіі Святога Роха айцец Юрый Санько абверг інфармацыю некаторых блогераў і паведаміў прэсе, што адбываецца тэрміновая замена даху святыні. Заняцца гэтым планавалі яшчэ ў мінулым годзе, але неабходныя грошы знайшліся толькі цяпер.

Да кастрычніка ўсе работы павінны быць завершаны - у гэты час тут пройдзе фестываль арганнай музыкі. Касцельнаму аргану таксама нічога не пагражае - інструмент абаронены ад будаўнічых работ.

- Замена даху неабходная, каб захаваць святыню. Дахавая сістэма была зроблена няправільна, дах быў аварыйны і важыў 75 тон. Таму яго неабходна тэрмінова палегчыць і замяніць чарапіцу. Міністэрства культуры дало неабходны дазвол, - распавёў святар.

Дарэчы, імшы ў касцёле па-ранейшаму праходзяць, нягледзячы на рамонт.