Чырвоны касцёл: набліжаецца завяршэнне рэканструкцыі

Аб ходзе рэканструкцыі каталіцкага храма святога Сымона і святой Алены ў Мінску, вядомага як Чырвоны касцёл, афіцыйнай інфармацыі па-ранейшаму няма. Але меркаваць аб ступені гатоўнасці аб'екта дазваляюць звязаныя з ім аб'явы на сэрвісе дзяржзакупак.

Калі ў пачатку жніўня мы распавядалі аб новым этапе рэканструкцыі і рабілі высновы аб высокай ступені гатоўнасці аб'екта, то цяпер гэта можа пацвердзіць чарговая закупка.

Будаўнічая арганізацыя абвясціла аб пошуку субпадрадчыка для выканання работ па ўстаноўцы шклянога казырка, металічнай лесвіцы і мантажы агародж. Гэта ўнутраныя работы: казырок усталююць над уваходам у склеп, лесвіцы — унутры памяшканняў. Гэтыя работы павінны пачацца ў кастрычніку і працягнуцца два месяцы.

У вернікаў дагэтуль няма ніякіх звестак пра тое, на якіх умовах дзяржава плануе вярнуць храм у карыстанне парафіі пасля завяршэння работ. Акрамя таго, яны даведаліся, што ў першапачатковы праект рэканструкцыі яшчэ да пачатку работ былі ўнесены змены, якія насцярожылі.

Адна з такіх змен — на першым паверсе функцыянальнае прызначэнне памяшкання канцылярыі зменена на хол. Ці будзе прадугледжана канцылярыя парафіі ў іншым месцы, у дакументацыі не пазначана.

Яшчэ адна змена: у падвальным паверсе два памяшканні для гуртковых заняткаў дарослых заменены на каморы (памяшканні для захоўвання гаспадарчага інвентара).

Што могуць азначаць гэтыя змены, пакуль не зразумела. Магчыма, нічога сур'ёзнага, але ёсць верагоднасць, што яны ўказваюць на планы па змене дзейнасці парафіі ў касцёле.

Да ўводу аб'екта ў эксплуатацыю па графіку застаецца 4 месяцы — Чырвоны касцёл павінен быць адкрыты ў студзені 2027 года.

У парафіі працягваюць малітву аб тым, каб святыню як мага хутчэй вярнулі вернікам, і каб яны змаглі ў ім праслаўляць Бога і здзяйсняць сакрамэнты. Праўда, з заклікам да такой малітвы кожны раз пасля нядзельнай імшы звяртаецца толькі вікарый парафіі, а пробашч практычна не згадвае пра касцёл, робячы парафіяльныя аб'явы.

У верасні спаўняецца 4 гады з таго моманту, як Чырвоны касцёл зачынілі пасля дзіўнага пажару.

Наш канал в Telegram – только интересное и важное. Подписаться >