Лепшыя музыкі Гомеля сыгралі Калядны канцэрт у касцёле [фота]
- Written by gomel.catholic.by
- Published in Навіны - Гомель
- Comments (1)
30 снежня ў гомельскай рыма-каталіцкай царкве прайшоў традыцыйны Калядны канцэрт класічнай музыкі, які кожны год ладзіць у храме Таццяна Томсан і яе сябры.
Зала гомельскага касцёла сустрэла музыкаў аншлагам. Перад пачаткам канцэрту пробашч парафіі айцец Славамір Ласкоўскі адзначыў, што музыка - гэта таксама хвала Госпаду:
- Бог - для нас усіх. Незалежна ад таго, да якой канфесіі мы належым, і нават калі лічым сябе атэістам, Гасподзь прыйшоў для ўсіх. І да апошняга моманту жыцця кожнага Ён змагаецца за тое, каб чалавек адкрыў для Яго сваё сэрца. Бедная Бэтлеемка, якую вы бачыце ў алтара, - вось уся праўда пра нас.
Святар пажадаў, каб святло музыкі павяло на нябёсы і дапамагло адчуць радасць Раства.
У касцёле з бясплатным канцэртам выступілі лепшыя музыканты Гомеля з гарадскога сімфанічнага аркестра і іншых калектываў. Парафіяне і госці храма пачулі музыку эпохі барока, класіцызму, 20-га стагоддзя.
- Мы кожны год бясплатна ладзім такія канцэрты, каб прынесці радасць аматарам музыкі. Для іх мы стараемся. Нехта ж павінен гэта рабіць! І нам самім гэта падабаецца.
Пасля заканчэння выступу біскуп Казімір, які прысутнічаў на канцэрце, падарыў музыкам і слухачам маленькія іконы. А ксендз Славамір дадаў:
- У мяне пыталіся, колькі каштуе квіток на гэты канцэрт. Дык вось, ідзіце і рабіце дабро – такі кошт гэтага квітка!
Related items
- «Бог даў нам адсутнасць паветранай трывогі». Пра Дзень дзіцяці ў Жытоміры распавёў біскуп
- І ў горадзе, і ў вёсцы: фестываль арганнай музыкі пройдзе ў касцёлах Беларусі
- Такі падарунак – толькі ад байкераў. Мотасезон яны адкрылі ў касцёле
- Беларусы даказваюць у судах «польскія карані» – з дапамогай веры
- На «гучныя» службы ў касцёле паскардзіўся жыхар Смаргоні. Што яму адказалі?