У Мінску абвясцілі аб планах стварыць сквер на былых каталіцкіх могілках. Але... там ужо даўно ідзе будоўля

Адміністрацыя Савецкага раёна Мінска абвясціла грамадскае абмеркаванне ўнясення зменаў у горадабудаўнічы праект дэталёвага планавання рэканструкцыі жылога квартала «Залатая Горка». Яно стартуе 26 лютага.

Як мы заўважылі, да аб'явы прымацаваная Тлумачальная запіска дэталёвага плана, датаваная яшчэ 2023 годам. Дакумент паказвае, у прыватнасці, як павінен выглядаць квартал «Б» у межах праспекта Незалежнасці, вуліцы Казлова, бульвара Мулявіна і вуліцы Залатая Горка, дзе знаходзіцца касцёл святога Роха.

У плане прадугледжаны сквер плошчай 1,65 га ў зоне паўднёва-заходняй ускраіны квартала «Б» на тэрыторыі былых Залатагорскіх могілак.

Але выглядае так, што дакумент састарэў. Верагодна, сквер павінен знаходзіцца на пустцы, дзе ў 2025 годзе раптоўна пачалі будаваць сакрэтны будынак [усе фота — з сацсетак].

Распавядаючы пра план, многія СМІ напісалі, што сквер павінен быць на месцы знесенай антэны-глушылкі за касцёлам і на суседніх участках. Сапраўды, іншага месца такой плошчы ў квартале «Б» не відаць.

Аднак прэса ўпусціла з-пад увагі, што ўся пустка ў 2025 годзе была аддадзеная пад узвядзенне вялікага аб'екта, які ў пашпарце пазначаны як «будынак шматфункцыянальны», а напраўду – паводле неафіцыйнай інфармацыі – з'яўляецца аб'ектам спецслужбаў.

У плане ж прапісана «захаванне існых і будаўніцтва дадатковых новых участкаў зялёных насаджэнняў агульнага карыстання, у тым ліку сквера пл.1,65 га ў зоне паўднёва-заходняй ускраіны квартала «Б»на тэрыторыі былых каталіцкіх могілак з выкарыстаннем гэтага ўчастка ў якасці зялёных насаджэнняў агульнага карыстання і ўпарадкаваннем пад адкрытым небам часовых нестацыянарных элементаў выставачнага характару».

Тое, што план страціў актуальнасць, добра відаць на картах Google – спадарожнікавыя здымкі зафіксавалі месца будоўлі. Ніжэй прыводзім скрыншоты актуальнай карты ў параўнанні з захаванымі панарамнымі фота.

Да таго, як частку ўчастка, аддадзенага пад будаўніцтва, забралі ў парафіі, там былі пляцоўка для дзяцей, экспазіцыя рэтра-аўтамабіляў, сквер, дарожкі, пляцоўка, на якой праводзілі агульнагарадскі Крыжовы шлях.

Зараз у абноўленай кадастравай карце за касцёлам замацаваны ўчастак плошчай толькі 0,35 га.

Мы паведамлялі, што ў пачатку будаўніцтва на месцы былых могілак з зямлі былі паднятыя шматлікія чалавечыя парэшткі. Іх абяцалі перадаць парафіі для перапахавання, але гэта пакуль не зроблена, наколькі вядома вернікам. Яны спадзяюцца, што гэта ўсё ж адбудзецца.

У плане таксама гаворыцца пра перспектыву зносу малапавярховых будынкаў і гаражоў, размешчаных на тэрыторыі былых каталіцкіх могілак. Але тыя будынкі і гаражы, якія знаходзіліся паблізу касцёла і глушылкі, ужо былі знесены разам з ёй дзеля будаўніцтва таго самага аб'екта.

Наш канал в Telegram – только интересное и важное. Подписаться >