Прэзідэнт запрасіў у Беларусь Папу і Патрыярха, каб памаліцца аб міры ва Украіне

Прэзідэнт Беларусі пракаментаваў журналістам сваю сустрэчу з Папам Рымскім, падчас якой Аляксандр Лукашэнка запрасіў Францішка наведаць Беларусь і сустрэцца тут з Патрыярхам Кірылам.

- Усё ў руках Госпада. Калі ён дабраславіць, нашы вышэйшыя іерархіі каталіцкай і праваслаўнай цэркваў сустрэнуцца на беларускай зямлі, - цытуе прэса прэзідэнта Беларусі. Паводле яго слоў, Каталіцкая і Праваслаўная цэрквы могуць запрасіць на гэтую сустрэчу прадстаўнікоў і іншых канфесій, а таксама мусульманскага свету і юдэяў.

У якасці нагоды для такой маштабнай сустрэчы Аляксандр Лукашэнка прапаноўвае аддаць даніну памяці загінулым падчас Першай і Другой сусветных войнах. Таксама прэзідэнт лічыць, што да такой сустрэчы можна пабудаваць храмы ці капліцы розных канфесій каля мемарыяльнага комплексу «Трасцянец» - на месцы спалення фашыстамі мірных жыхароў розных нацыянальнасцей і веравызнанняў.

Акрамя таго прэзідэнт адзначыў, што пры сустрэчы ў Беларусі Папы Рымскага і Патрыярха Маскоўскага кіраўнікі цэркваў маглі разам памаліцца аб міры ва Украіне.

- Я выказаў (Папе Францішку - рэд.) сваю пазіцыю, што сітуацыя на ўсходзе Украіны мае патрэбу ў новых ініцыятывах, і пажадана духоўных, - сказаў Аляксандр Лукашэнка і заявіў, што міратворчаму працэсу магла б спрыяць сустрэча Папы і Патрыярха. - Я запрасіў іх у Беларусь. Запрасілі б святароў і еўрапейскіх, і ўкраінскіх, і расійскіх, і нашых. Селі б, пагаварылі, а потым усп разам перад мільёнамі паломнікаў памаліліся бы ў імя міру.