У Беларусі адзначаецца 420-годдзе Уніяцкай царквы
- Written by katolik-gomel.by
- Published in Царква
- Add new comment
Грэка-католікаў павіншавалі Арцыбіскуп і Апостальскі Нунцый.
Старшыня Канферэнцыіі Каталіцкіх Біскупаў у Беларусі Мітрапаліт Тадэвуш Кандрусевіч ад імя епіскапату скіраваў віншавальнае слова архімандрыту Сяргею Гаеку Апостальскаму візітатару для грэка-католікаў Беларусі з нагоды 420-годдзя абвяшчэння Брэсцкай Уніі.
«Праз Акт царкоўнай Уніі на Сінодзе ў Брэсце 16–18 кастрычніка 1596 г. іерархі Усходняй Царквы і Каталіцкага Касцёла лацінскага абраду на нашых землях атрымалі каштоўны Божы Дар — жыць і супрацоўнічаць дзеля збаўлення людзей ў поўнай царкоўнай Еднасці, у духу братэрства і салідарнасці. Супольная душпастырская праца іерархаў і святароў Уніяцкай Царквы і Рыма-Каталіцкага Касцёла ў мінулым прынесла багаты плён у сферы духоўнага жыцця, адукацыі, культуры, архітэктуры, мастацтва», — падкрэслівае старшыня беларускага епіскапату.
«У каталіцкіх святынях перад цудадзейнымі іконамі згодна маліліся вернікі двух абрадаў і чэрпалі сілы для супольнага мужнага сведчання Евангелля — у часы супакою і ў часы пераследу, — узгадвае ў віншавальным слове іерарх. — Ужо больш за 25 гадоў вернікі Грэка-каталіцкай Царквы і вернікі Рыма-каталіцкага Касцёла ў Беларусі могуць зноў адкрыта вызнаваць каталіцкую веру і супольна сведчыць пра каштоўны Дар Еднасці, якой Хрыстус жадаў для ўсіх сваіх вучняў».
Раней Апостальскі Нунцый у Беларусі, арцыбіскуп Габар Пінтэр скіраваў пасланне з нагоды 420-годдзя падпісання Брэсцкай уніі. Ён нагадаў, што “Сінод, які праходзіў з 16 па 18 кастрычніка 1596 г., паспрыяў аднаўленню поўнай еднасці розных касцёльных супольнасцяў гэтай зямлі з Апостальскім Пасадам у Рыме, заахвочваючы вернікаў да ўзрастання ў веры, надзеі і любові ў той складаны перыяд”.
“Брэсцкая унія прывяла да ўмацавання духоўнага і культурнага абмену паміж хрысціянамі з Усходу і іх братамі на Захадзе, што ў сваю чаргу паспрыяла росквіту культуры, выхавання і архітэктуры. Да сённяшняга дня сведкамі гэтай падзеі з’яўляюцца некаторыя святыні і шматлікія іконы, напісаныя ў перыяд пасля падпісання Уніі. Гэта каштоўная духоўная спадчына ў гісторыі Касцёла ў Беларусі”, - цытуе Сatholic.by.
Related items
- Манах з Гудагая зрабіў арэлі для парафіі ў Мінску
- Напярэдадні Вялікадня праваслаўны архіепіскап наведаў каталіцкі цэнтр у Гомелі
- Фэст у лясной капліцы з незвычайнай гісторыяй святкавалі капуцыны і пілігрымы
- Праваслаўная Велікодная служба па-беларуску з анлайн-трансляцыяй пройдзе ў Вільні
- «Бог даў нам адсутнасць паветранай трывогі». Пра Дзень дзіцяці ў Жытоміры распавёў біскуп