«Вокны выбілі не пажарныя». Што адбываецца з зачыненым Чырвоным касцёлам?

Каталіцкія вернікі Мінска паведамілі апошнія звесткі аб тым, што адбываецца з Чырвоным касцёлам, зачыненым пасля дзіўнага інцыдэнта. 29 верасня ў храме была следчая група, якая дазволіла работніку касцёла агледзець не ўсе памяшканні: 

«Пусцілі не ўсюды. На пытанні неахвотна адказвалі, вочы апускалі. Сказалі, што праз два дні аддадуць ключы, каб навесці парадак і ліквідаваць непаладкі нібыта ў пажарнай сістэме, тады можна будзе адчыніць касцёл». 

Вернікі адзначаюць, што так следчыя казалі і адразу пасля пажару, але потым мясцовыя ўлады прынялі рашэнне аб закрыцці храма на нявызначаны тэрмін.

Таксама з'явіліся некаторыя падрабязнасці здарэння: 

«Вокны дакладна не выбівалі пажарныя. Так сказалі супрацоўнікі касцёла. Пажарным адкрыла дзверы дзяжурная, не было патрэбы разбіваць вокны. Яны былі разбітыя раней. У МНС пацвердзілі, што звычайна не разбіваюць вокны – толькі калі зачыненыя дзверы». 

Паводле вернікаў, працаўнікі касцёла звярталі ўвагу міліцыі, што нехта выбіў вокны раней: 

«І ахоўнікі будынку насупраць бачылі, што нехта круціўся ўначы перад вокнамі касцёла, перад тым як прыехалі пажарныя. У іх забралі запісы відэаназірання. На другім паверсе ўсярэдзіне выгараны толькі адзін пакойчык – там, дзе выбіта шкло. Злева і справа пакоі не кранутыя агнём».

Нагадаем, у МНС заявілі, што ў храме загарэлася электраправодка, аднак пажар тушылі вадой, што можа аспрэчваць афіцыйную версію.

З моманту закрыцця касцёла, 26 верасня, група вернікаў збіраецца на малітву пад сценамі храма штовечар.