Рэкордная колькасць дзяцей прыме Першую Камунію ў мінскім катэдральным касцёле

Архiкатэдральны касцёл Імя Найсвяцейшай Панны Марыі паведаміў, што 10 траўня на святой Імшы 102 дзіцяці з катэдральнай парафіі прыступяць да Першай Святой Камуніі.

Паводле нашых назіранняў, гэта рэкордная колькасць. Летась Першую Камунію прымалі ў мінскім катэдральным касцёле 95 дзяцей, а ў ранейшыя гады – па 40-50 дзяцей, прынамсі да 2023 года ўключна. Атрымліваецца, у апошнія два гады колькасць першакамунійных дзяцей у мінскім катэдральным касцёле ўзрасла ўдвая.

Аднак гэтая лічба наўрад ці сведчыць аб настолькі вялікім прытоку новых каталіцкіх вернікаў. Справа ў тым, што ў катэдры ўжо болей за тры гады вымушана знаходзіцца буйная парафія закрытага Чырвонага касцёла. Верагодна, бацькі з парафіі святога Сымона і святой Алены апошнія гады аддаюць дзяцей для падрыхтоўкі да Першай Камуніі ў катэдральную парафію.

Апошні раз у 2023 годзе паведамлялася аб асобным свяце Першай Камуніі для дзяцей з парафіі святога Сымона і святой Алены – тады яе прымалі звыш 50 дзяцей. І прыкладна столькі ж – у катэдральнай парафіі.

Выглядае так, што цяпер усе дзеці, або большасць, з парафіі Чырвонага касцёла рыхтуюцца да Першай Камуніі і прымаюць яе разам з дзецьмі архікатэдральнай парафіі.

Галоўнае фота – са старонкі Аляксандры Шчыглінскай.

Наш канал в Telegram – только интересное и важное. Подписаться >