Не пашкадуй рубель: стартавала галасаванне конкурсу сацпраектаў Social Weekend

Каталіцкае «Радыё Марыя» ў Беларусі ўдзельнічае ў конкурсе сацыяльных праектаў Social Weekend. 3 кастрычніка пачалося народнае галасаванне за прапанаваныя праекты. У 12-ы штогадовы конкурс Social Weekend пройдуць 20 праектаў, якія набяруць найбольшую колькасць галасоў на момант 21.00 7 кастрычніка - заканчэнне галасавання. Пакуль у 20-цы лідэраў знаходзіцца праект «Радыё Марыя» - «Вайфай-радыё для пажылых людзей».

- Мы адважыліся паказаць грамадскасці, што ёсць і такі спосаб зрабіць свет лепшым, і вырашылі прыняць удзел, - гавораць прадстаўнікі хрысціянскай радыёстанцыі. - На гэтым конкурсе прадстаўляем толькі маленькую частку таго, што робім. Праз удзел у гэтым мерапрыемстве мы не толькі зможам пазнаёміць значную колькасць людзей з дзейнасцю радыё, але і атрымаць невялікія грошы.

На гэтыя сродкі РМ зможа змайстраваць некалькі дзясяткаў вайфай-радыё для тых, хто ў іх мае патрэбу (старыя ды адзінокія людзі, якім немагчыма выкарыстоўваць кампутар або смартфон, у тым ліку людзі ў дамах састарэлых і хоспісах).

Каб прагаласаваць за сацыяльны праект «Радыё Марыя», трэба даслаць адно SMS на кароткі нумар 7755. Тэкст SMS: 2043 (толькі 4 лічбы, без прабелаў і іншых знакаў). Кошт адпраўкі - каля 1 рубля. SMS могуць адпраўляць толькі абаненты беларускіх мабільных аператараў.