Мазаіка, фрэскі: у сеціве дзеляцца работамі Алеся Пушкіна, які памёр у зняволенні

Пасля шакавальнага паведамлення пра раптоўную смерць у зняволенні беларускага мастака Алеся Пушкіна ў сацыяльных сетках з'явіліся сотні допісаў з працамі мастака. Сярод іх – шмат здымкаў з каталіцкіх храмаў, афармленнем якіх займаўся Алесь Пушкін.

Гэта, у прыватнасці, касцёлы ў Магілёве, Вішневе, Міхалішках, Беразінскім, капліца Святога Яна Хрысціцеля ў Мінску. Тут ён рабіў мазаіку, у іншых храмах – іконы Крыжовага шляху, фрэскі.

Нагадаем, пасля вызвалення з турмы Алесь Пушкін марыў удзельнічаць у аднаўленні роспісаў у пашкоджанай пажарам Будслаўскай базыліцы. Мастак любіў гэтае месца – фота падчас яго працы ў Будславе апублікаваў краязнаўца Кастусь Шыталь.

12 ліпеня ў праваслаўны прыходзе Дабравешчання Усясветнага Патрыярхату ў Вільні адбудзецца паніхіда па спачылым мастаку – ён быў праваслаўным вернікам. Пра дату і месца пахавання Алеся Пушкіна пакуль не паведамляецца.

Паводле апошняй, неафіцыйнай, інфармацыі, мастака даставілі з гродзенскай турмы ў шпіталь ужо ў непрытомным стане – медыкі не змаглі яго ўратаваць. Акалічнасці смерці застаюцца нявысветленымі.

Наш канал в Telegram – только интересное и важное. Подписаться >