З розніцай у 13 разоў выдзелена дзяржпадтрымка на праваслаўны і каталіцкі «духоўныя цэнтры» Беларусі

З дзяржаўных сродкаў выдзелена звыш 3,6 млн рублёў на рэстаўрацыю праваслаўнага храма ў Жыровічах і каталіцкага ў Будславе. Гэтыя сродкі будуць накіраваныя з прэзідэнцкага фонду, паведаміла 11 чэрвеня прэс-служба Аляксандра Лукашэнкі. Аднак выдзеленыя сумы значна адрозніваюцца.

Калі на рэстаўрацыю іканастаса Успенскага сабора ў Жыровічах пералічаць 3,4 млн рублёў, то для правядзення работ у касцёле Унебаўзяцця Найсвяцейшай Панны Марыі ў Будславе – каля 260 тыс. рублёў, гэта значыць у 13 разоў менш.

Пры тым, што каталіцкі храм – помнік архітэктуры рэспубліканскага значэння – патрабуе не проста рэстаўрацыі, а тэрміновага рамонту. Як мы паведамлялі, толькі на праектныя работы неабходна звыш 1,4 млн рублёў, таму ў пачатку года парафія аб'яўляла аб зборы ахвяраванняў.

Раней, адразу пасля разбуральнага пажару ў 2021 годзе, грамадзяне і прадпрыемствы пералічылі парафіі амаль 1,5 млн рублёў ахвяраванняў. Гэтыя сродкі пайшлі на тэрміновыя работы, уключаючы часовы дах. Цяпер даўно надышла пара мяняць яго на пастаянны.

Выдзеленыя з дзяржаўнага фонду грошы будуць накіраваныя ў тым ліку на распрацоўку дакументацыі па ўзмацненні падмуркаў, сцен, скляпенняў і падпружных арак, гаворыцца ў афіцыйнай інфармацыі.

Раней дзяржпадтрымка не выдзялялася, касцёл у Будславе не быў уключаны ў новую рэспубліканскую інвестыцыйную праграму.

Нагадаем, менавіта Будслаў і Жыровічы былі названыя з ініцыятывы ўладаў «духоўнымі цэнтрамі» Беларусі.

Наш канал в Telegram – только интересное и важное. Подписаться >