Мітрапаліт Тадэвуш Кандрусевіч заклікаў маліцца аб перамовах па Украіне ў Мінску

Мінск, 11 лютага 2015 г.

Глыбокапаважаныя вернікі і ўсе людзі добрай волі!

Усе мы вельмі занепакоены развіццём сітуацыі ў братняй Украіне, дзе не сціхае, але разрастаецца збройны канфлікт. У выніку чаго церпяць і гінуць як непасрэдныя яго ўдзельнікі, так і ні ў чым не вінаватыя мірныя людзі, з дня на дзень павялічваецца колькасць бежанцаў, разбураюцца гарады і вёскі, нішчыцца эканоміка, нарастае сацыяльна-палітычная напружанасць і г.д.

З кожным днём становіцца ўсё больш ясна, што канфлікт немагчыма вырашыць збройнымі дзеяннямі, якія пагражаюць непрадказальнымі наступствамі, могуць выйсці з-пад кантролю і ўцягнуць у яго многія краіны свету. Адзіным шляхам яго вырашэння з’яўляецца дыялог, аб чым не аднойчы заяўляў таксама і Папа Францішак. 

У апошнія дні з’явілася новая надзея на дыпламатычнае вырашэнне гэтага зацяжнога канфлікту, аб чым сведчаць інтэнсіўныя кантакты, перамовы і заявы сусветных палітычных лідараў. Учора ў Мінску адбылося пасяджэнне Трохбаковай кантактнай групы па Украіне. На сёння ў беларускай сталіцы ў так званым нармандскім фармаце запланавана сустрэча Прэзідэнтаў Украіны, Расіі і Францыі, а таксама Канцлера Германіі з мэтай выпрацаваць канкрэтныя шляхі вырашэння канфлікту.

Сімвалічна, што 11 лютага, у літургічны ўспамін Найсвяцейшай Панны Марыі з Люрда, Каталіцкі Касцёл адзначае Сусветны дзень хворых. Сітуацыя ва Украіне пацвярджае стан духоўнай хваробы, калі чалавек не жадае жыць паводле Божага закону любові да бліжняга і павагі да яго правоў.

Звяртаюся да вас, вернікі і людзі добрай волі: не заставайцеся абыякавымі да ўкраінскай трагедыі і лёсу нашых украінскіх братоў і сясцёр, маліцеся аб поспеху мінскай сустрэчы, каб доўгачаканы мір нарэшце запанаваў у нашых паўднёвых суседзяў, каб там як мага хутчэй завяршыліся жахі збройных дзеянняў і людзі маглі спакойна жыць.

Маці Божая Люрдская, выпрасі ў свайго Сына Езуса Хрыста ласку міру ва Украіне.

Арцыбіскуп Тадэвуш Кандрусевіч
Мітрапаліт Мінска-Магілёўскі, Сatholic.by