У Беларусі рэфармуюць каталіцкія семінарыі
- Written by katolik-gomel.by
- Published in Царква
- Comments (1)
Студэнтаў з розных рэгіёнаў аб'яднаюць, уводзіцца год падрыхтоўкі.
“Каталіцкія семінарыі Беларусі чакаюць перамены і мадыфікацыя”, — паведаміў “Каталіцкаму Весніку” біскуп Аляксандр Яшэўскі SDB, які ўзначальвае Камiсію па справах фармацыi семiнарыстаў i святароў пры Канферэнцыі Каталіцкіх Біскупаў Беларусі.
Па словах іерарха перамены ў арганізацыі навучальнага працэсу ў беларускіх семінарыях звязаны перадусім з візітам у Беларусь у маі 2015 года Сакратара кангрэгацыі па справах духавенства арцыбіскупа Хорхэ Карласа Патрона Вонга. Вынікам гэтага візіту стаў ватыканскі дакумент, у якім прапануецца арганізаваць прапедэўтычны год у семінарыях. Гэта значыць, семінарысты, перш чым пачаць непасрэдна навучанне ў вышэйшай духоўнай семінарыі, павінны будуць прайсці год падрыхтоўкі.
Як вядома, на сённяшні дзень у Беларусі функцыянуюць дзве духоўныя каталіцкія семінарыі: у Гродне і Пінску. Пасля падрыхтоўчага году навучэнцы будуць вывучаць філасофію ў семінарыі ў Пінску, а тэалогію – у семінарыі ў Гродне.
Па словах біскупа Аляксандра Яшэўскага SDB такі навучальны працэс дазволіць семінарыстам лепш спазнаць агульнабеларускую сітуацыю Касцёла, пазнаёміцца з багаццем Касцёла як на ўсходзе, так і на захадзе Беларусі. Аб’яднанне студэнтаў з розных рэгіёнаў Беларусі стане таксама добрым грунтам для паўстання Духоўнай Акадэміі ў Мінску.
Біскуп Аляксандр зазначыў таксама, што акрамя яго над мадыфікацыяй навучальнага працэсу ў семінарыях працуюць члены камісіі: бiскуп Юзаф Станеўскi з Гродна, бiскуп Антонi Дзям’янка з Пінска, кс. Раман Рачко, рэктар семінарыі ў Гродне, i кс. Андрэй Рылка, рэктар семінарыі ў Пінску.
Плануецца, што запланаваныя змены ўвойдуць у жыццё з новага навучальнага года ў 2016 годзе.
Related items
- Напярэдадні Вялікадня праваслаўны архіепіскап наведаў каталіцкі цэнтр у Гомелі
- Фэст у лясной капліцы з незвычайнай гісторыяй святкавалі капуцыны і пілігрымы
- «Бог даў нам адсутнасць паветранай трывогі». Пра Дзень дзіцяці ў Жытоміры распавёў біскуп
- Пад'ём у 3:30, маўчанне і ніякіх гаджэтаў. Адзіны ў свеце беларус камельдул наведаў родны горад
- «Пад зямлёй адчула сябе шчаслівай». Беларуска працуе ў шахце і запрашае туды на Імшу