Трох вядомых каталіцкіх святароў выдвараюць з Беларусі - заява Касцёла
- Written by katolik-gomel.by
- Published in Царква
- Comments (3)
Арцыбіскуп: Касцёл знаходзіцца ў цяжкай сітуацыі, і дапамагачы выйсці з яе могуць новыя пакліканні.
Дзяржаўныя ўлады Беларусі не далі дазвол на служэнне ў краіне тром святарам з Польшчы. З гэтай нагоды апублікаваныя звароты Арцыбіскупа Тадэвуша Кандрусевіча, Мітрапаліта Мінска-Магілёўскага, а таксама біскупа вікарыя для Магілёва і Магілёўскай вобласці Аляксандра Яшэўскага SDB.
- Радасныя святкаванні cярэбранага юбілею заснавання Мінска-Магілёўскай мітраполіі былі азмрочаны рашэннем дзяржаўных уладаў аб неўзгадненні душпастырскай дзейнасці трох святароў з Польшчы: дамініканіна а. Рамана Шульца OP - пробашча парафіі Св. Казіміра ў Магілёве, канвентуальнага францішканіна а. Леха Баханэка OFM Conv - пробашча парафіі Св. Міхала Арханёла ў Івянцы, аблата а. Ежы Катоўскага OMI - пробашча парафіі Найсвяцейшага Сэрца Езуса і св. Крыштафа ў Калодзішчах. 11 ліпеня я разам з біскупскім вікарыем для Магілёўскай вобл. Яго Эксцэленцыяй біскупам Аляксандрам Яшэўскім SDB сустрэўся з Упаўнаважаным па справах рэлігій і нацыянальнасцяў пры Савеце Міністраў Рэспублікі Беларусь Леанідам Паўлавічам Гулякам з мэтай высветліць прычыну адмовы для служэння вышэйзгаданым святарам і прасіць дазволу для іх працягнуць сваё служэнне. Аднак з вялікім жалем павінен паведаміць, што мы не даведаліся аб канкрэтных прычынах такога рашэння і пачулі рашучую адмову магчымасці іх далейшага служэння ў Беларусі, - цытуе Арцыбіскупа Catholic.by.
- На жаль, падчас нашай сустрэчы мы не атрымалі адказу на пытанне аб падставах прынятага рашэння і сустрэліся з катэгарычнай адмовай перагледзець альбо змяніць яго. Айцец Раман павінен 20 ліпеня пакінуць нашу краіну і Магілёўшчыну, - дадае біскуп Аляксандр Яшэўскі.
Мітрапаліт адзначае, што гэтыя святары доўга і вельмі плённа служылі вернікам Беларусі: будавалі і рамантавалі касцёлы, катэхізавалі, займаліся хрысціянскім выхаваннем дзяцей і моладзі, дабрачыннасцю:
- Дастаткова толькі паглядзець на касцёл св. Міхала Арханёла ў Івянцы, які дзякуючы намаганням а. Леха Баханэка OFM Conv са знішчанага паўстаў нанова як шэдэўр сакральнай архітэктуры! А колькі дзяцей штодзённа прыходзіць на зробленую ім пры касцёле пляцоўку для іх! А якія магчымасці ён стварыў юнакам, дзяўчатам і дарослым займацца спортам і весці здаровы лад жыцця! Не толькі ў Беларусі, але і далёка па-за яе межамі вядомыя арганізаваныя ім Дні моладзі, «Музычныя майстэрні» і Парафіяды!
Маючы на ўвазе, што такое рашэнне дзяржаўных уладаў - гэта вельмі вялікая страта для Мінска-Магілёўскай архідыяцэзіі, прашу маліцца аб пакліканнях да святарства і кансэкраванага жыцця, дадае Арцыбіскуп. Ён заклікае ад усяго сэрца падзякаваць гэтым святарам за іх адданую і ахвярную працу па адраджэнні Касцёла ў Беларусі і памаліцца аб благаслаўленні на іх далейшае служэнне на хвалу Бога і для збаўлення людзей.
Таксама Мітрапаліт звяртаецца да юнакоў: калі вы чуеце голас клічучага да святарства Хрыста, адважна адкажыце на яго словамі прарока Ісаі: «Вось я, Пане, пашлі мяне». Адкажыце, бо ізноў Касцёл знаходзіцца ў цяжкай сітуацыі, і дапамагачы выйсці з яе могуць новыя пакліканні.
Related items
- Напярэдадні Вялікадня праваслаўны архіепіскап наведаў каталіцкі цэнтр у Гомелі
- Фэст у лясной капліцы з незвычайнай гісторыяй святкавалі капуцыны і пілігрымы
- «Бог даў нам адсутнасць паветранай трывогі». Пра Дзень дзіцяці ў Жытоміры распавёў біскуп
- І ў горадзе, і ў вёсцы: фестываль арганнай музыкі пройдзе ў касцёлах Беларусі
- Такі падарунак – толькі ад байкераў. Мотасезон яны адкрылі ў касцёле
RSS-стужка каментароў гэтага запiсу