У светлагорскім касцёле расказалі пра «Лепшага Сябра» [фота]

Традыцыйна на свята Божага Нараджэння ў светлагорскай парафіі прадставілі новую тэатральную пастаноўку.

- Гэтым разам - сцэнка «Найлепшы Сябар» з акцэнтам праўды прыходу Збаўцы на зямлю. Пачынаецца ўсё з песні, якая накіроўвае гледача ў сваё сэрца, каб зазірнуць у яго глыбіню, мары, жаданні... Потым з'яўляецца анёлак, які праз бінокаль глядзіць на Зямлю, людзей, бачыць іх запрацаваных, заклапочаных, сумных, слухае іх праблемы. А старэйшы анёл тлумачыць, што гэтак людзі рыхтуюцца да Святаў Божага Нараджэння. На глобусе знаходзяць Беларусь сінявокую і вырашаюць дапамагчы людзям знайсці Найлепшага Сябра. У гэтым часе, з другога боку неба выходзяць месяц і зоркі і таксама размаўляюць аб мінулым, аб сучасных людзях. Усе разам, анёлы, месяц і зоркі ляцяць на зямлю, каб сучасным людзям расказаць праўду аб Божай любові, якая сталася целам дзеля нашага збаўлення. І тут пачынаецца гісторыя Нараджэння Збаўцы. Што сёння сучаснаму чалавеку трэба - гэта Езус, Яго Любоў, - распавядае аўтар і рэжысёр сястра Таццяна Халапук.

30 снежня светлагорскія вернікі пакажуць спектакль у Жлобіне - для мясцовых католікаў.

Фота кс. Тадэвуша Саморэка