Як пражыць сёлетні Адвэнт - прапанова ад дамініканцаў з Магілёва

- Калі вы яшчэ не вырашылі, як у гэтым годзе пражыць Адвэнт, запрашаем чытаць з 1 па 31 снежня 31 раздзелаў «Кнігі Выслоўяў». Кожны дзень снежня - адзін раздзел. Гэта кніга Старога Запавету, умацаваная зараз за Кнігай Псальмаў. Хай гэта будзе нашая ўзаемная малітва за нашыя цяжкасці і падрыхтоўка да Божага Нараджэння і Новага Года. Варта не толькі штодзённа прачытаць раздзел, але таксама засяродзіцца ў маўчанні на словах, якія нас закранулі, а перад і пасля чытання памаліцца, напрыклад, «Вітай, Марыя», - прапанаваў сваім падпісчыкам у сацсетцы айцец Раман Шульц OP, aдміністратар парафіі святога Казіміра і святой Ядзвігі ў Магілёве.

Манах-дамініканін раіць далей: варта чытаць «Кнігу выслоўяў» штодзённа або хаця б адзін раз на тыдзень усёй сям’ёй:

- Можна прапанаваць сябрам, каб чытаючы Кнігу ў сваіх дамах, яны ядналіся з нашай парафіяй. Давайце таксама запісваць у сшытку выслоўі, якія спадабаліся, каб у канцы снежня сабраць іх і пашыць кашулькі з выслоўямі для нашай парафіі, а таксама банэр перад капліцай.