З інтэнцыяй аб супакоі. Упершыню пройдзе пілігрымка беларусаў замежжа

Абвешчана аб правядзенні першай пешай пілігрымкі беларусаў замежжа. Яна запланавана ў Польшчы на 24-30 ліпеня. За 7 дзён удзельнікі пройдуць каля 200 кіламетраў - з Варшавы да санктуарыя ў вёсцы Кастамлоты на мяжы з Брэсцкай вобласцю Беларусі.

«Сёлета будзем маліцца і разважаць пра супакой. Больш дэталёвая інфармацыя будзе дадавацца», - паведамілі арганізатары з каталіцкай супольнасці беларусаў у Варшаве. Дакладны маршрут і праграма пакуль у стадыі распрацоўкі.

У Кастамлотах знаходзіцца санктуарый падляшскіх мучанікаў - сялян, грэка-католікаў, якія загінулі ад расійскага войска ў 1874 годзе пры абароне сваёй уніяцкай царквы ад ператварэння яе ў праваслаўную ў час ліквідацыі Брэсцкай уніі на Падляшшы.

Запіс у пілігрымку ўжо трывае па спасылцы > Кантакты для пытанняў і прапаноў: Арцём Ткачук і кс. Вячаслаў Барок.

Нагадаем, у Беларусі цяпер праходзіць рэгістрацыя на традыцыйныя пілігрымкі ў Будслаў. Аднак не ўсе з іх будуць адноўлены пасля двухгадовага перапынку. У прыватнасці, паведамляецца аб тым, што не адбудзецца пілігрымка з Ліды.