Кветкі ў закрытых дзвярах і адзінокі святар: Чырвоны касцёл апублікаваў шчымлівыя фота

Парафія Святога Сымона і Святой Алены ў Мінску распавяла пра непрыкметны працяг працэсіі Божага Цела, якую католікі нядаўна правялі ў сталіцы. Нагадаем, сёлета ўпершыню агульнагарадская працэсія не падыходзіла да Чырвонага касцёла, бо ён па-ранейшаму застаецца закрытым – ужо на працягу амаль 9 месяцаў.

«Боль і смутак перажылі ўсе парафіяне, аднак асаблівым чынам яны закраналі сэрца пробашча ксяндза каноніка Уладзіслава. Таму, каб перапрасіць нашага Збаўцу Езуса Хрыста, Які ўжо амаль 9 месяцаў зняважаны і выгнаны са свайго дома, святар з Найсвяцейшым Сакрамэнтам у маленькай бурсе прадоўжыў шлях да нашага касцёла, абыйшоў яго з малітвай, каб як мага хутчэй былі струшчаны каменныя сэрцы, якія трымаюць закрытым Божы храм», – гаворыцца ў паведамленні парафіі.

У пэўны момант да святара далучылася адна з парафіянак разам з мужам – на фота ёсць момант, калі сужэнцы і пробашч разам стаяць на каленях перад зачыненым храмам. Дарэчы, на фота можна ўбачыць і кветкі на ганку і ў дзвярах касцёла.