Тысячы вернікаў наведалі Будслаў – фэст вачамі пілігрымаў

Ліпень 1, 2023
Written by KATOLIK.LIFE
Published in Царква
Add new comment

Звыш 1800 паломнікаў прыбылі ў каталіцкі Нацыянальны санктуарый пешшу – яны дзяліліся відэа, якія перадавалі атмасферу ўрачыстасці.

Тысячы пілігрымаў наведалі фэст у Будславе 30 чэрвеня – 1 ліпеня, з іх 1862 вернікі прыбылі ў каталіцкі Нацыянальны санктуарый пешшу і на роварах. Адзначым, што гэта меней, чым у мінулыя гады, калі ў Будслаў з пешымі пілігрымкамі прыходзілі, у сярэднім, каля 2600 вернікаў.

Найбольш масавым набажэнствам стала вячэрняя працэсія з копіяй цудатворнага абраза Маці Божай Будслаўскай 30 чэрвеня, начная Эўхарыстыя і цэнтральная святая Імша 1 ліпеня, якую цэлебраваў спецыяльны пасланнік Папы Рымскага арцыбіскуп Клаўдыё Гуджэроцці.

Ён выказаў захапленне беларускім народам і заклікаў беларусаў не пераставаць верыць у Бога, нягледзячы ні на якія цяжкасці. Францішак скіраваў на ўрачыстасці свайго легата з нагоды 25-годдзя каранацыі абраза Маці Божай Будслаўскай.

Паломнікі публікавалі відэа на сваіх старонках у Instagram, якія перадаюць атмасферу фэсту – якім яго бачылі пілігрымы.