Унікальную серыю ікон стварае майстар крыжа Ефрасінні Полацкай. Сцвярджаецца, што праз адну ўжо здараліся цуды

У сеціве з'явіўся новы паблік – пра серыю з 12 «абразоў-сясцёр». Гэта незвычайныя для Беларусі іконы, якія пакуль яшчэ не ўсе вырабленыя, бо працэс стварэння кожнай – у сярэднім 6-8 месяцаў. На дадзены момант гатовыя 7 лікаў святых.

Яны вырабляюцца з выкарыстаннем тэхнікі перагародкавай эмалі, уключаючы тэхніку старажытнавізантыйскай эмалі. Асноўнымі матэрыяламі абразоў з'яўляюцца золата, срэбра, каштоўныя і напаўкаштоўныя камяні.

Аўтар унікальных абразоў – заслужаны мастак Беларусі Мікалай Кузьміч, які ўзнавіў знакаміты крыж Ефрасінні Полацкай.

Новыя абразы з гэтай серыі, прызначаныя для касцёлаў Беларусі, нядаўна благаславіў кардынал Клаўдыё Гуджэроці. А праз адзін абраз, як сцвярджаецца, ужо здарыліся цуды.

Першы абраз з серыі – святой Барбары, якая знаходзіцца ў каталіцкім храме ў Ружанах. Другі – Маці Божая Валадарка Лясоў. Ён не мае аналагаў і выраблены спецыяльна для касцёла ў Пружанах.

Праз малітоўны зварот да Маці Божай Валадаркі Лясоў адбыліся два ацаленні, паведамляецца ў апісанні абраза. Хоць шэраг вернікаў ставіцца да гэтага са скептыцызмам і доказаў цудаў пакуль не прадстаўлена.

Вось усё, што вядома пра гэтыя выпадкі: першае ацаленне адбылося падчас эпідэміі каронавірусу, другое – летам 2025 года:

«У абодвух выпадках хворыя жанчыны звярнуліся да Багародзіцы з просьбай даць ім кіслароду, якога ў Яе так шмат. Бо Яна – Уладарка Лясоў. І пасля гэтых малітваў абедзве жанчыны адчулі сябе лепш і ў выніку ачунялі».

Інфармацыі аб наступных абразах пакуль няма, але мы знайшлі некаторыя звесткі на старонцы ювелірнай галерэі Мікалая Кузьміча і ягонага сына Пятра.

Там паведамляецца, што 25 кастрычніка падчас урачыстасцяў у Пінску прэфект Дыкастэрыі па справах усходніх цэркваў у Ватыкане кардынал Клаўдыё Гуджэроці благаславіў новыя абразы Кузьмічоў – святога Мікалая, святой Веранікі і Вастрабрамскую ікону Божай Маці (апошняя – верагодна, па-за дадзенай серыі). Гэтыя іконы прызначаныя для новых храмаў Пінскай дыяцэзіі.

Раней былі створаны абразы святога Казіміра, святога Губерта і Арханёла Міхала.