Адзінота, цэлібат. Ксёндз шчыра назваў галоўныя цяжкасці сучасных святароў

Каб нагадаць пра малітву за святароў і аб новых пакліканнях, да якой вернікаў асабліва запрашаюць па чацвяргах, публікуем допіс маладога каталіцкага святара, ксяндза Артура Ляшнеўскага, які служыць у Жупранах.

У адказ на сцвярджэнні, што святарам нібыта лёгка жыць, не трэба хадзіць на працу, ксёндз пералічыў топ-7 сучасных выклікаў святарства:

– Адзінота і ізаляцыя

– Неабходнасць пастаяннага самаадмаўлення

– Ціск быць узорам для пераймання і быць асуджаным іншымі, калі да гэтага ўзору не дацягваеш

– Рэалізацыя цэлібату і змаганне з сэксуальнымі спакусамі

– Выклікі глабалізацыі, секулярызацыі і заняпаду рэлігійнасці

– Эмацыйны цяжар дапамогі людзям у вырашэнні іх праблем (пачуццё бездапаможнасці)

– Падтрыманне духоўнага жыцця і псіхічнага здароўя перад абліччам усіх гэтых выклікаў

Ксёндз дадаў, што яшчэ святары павінны змагацца з чаканнямі самарэалізацыі, недахопам часу для сябе і цяжкасцямі ў жыцці, што часта прыводзіць да крызісаў і патрэбы ў падтрымцы. Ён заклікаў вернікаў маліцца за сваіх святароў.

Асобна жупранскі пробашч распавёў пра пакліканне праз вобраз пінгвіна. Ён прывёў у прыклад некаторых пінгвінаў, якія пакідаюць свае зграі, марскі бераг, дзе маюць штодзённую ежу, і настойліва крочаць у бок гор:

«Гэтыя нібы дэзарыентаваныя птушкі здзяйсняюць падарожжы ў 70-80 км. Часта яны проста гінуць у гэтых таямнічых падарожжах. Таму пінгвін з’яўляецца сімвалам руху насустрач невядомаму, сімвалам рызыкі дзеля чагосьці важнага, а таксама сімвалам выбару рабіць штосьці не па схеме».

У каментарах вернікі падтрымліваюць святара, а ён не марнуе час у адзіноце і запісвае для іх цікавыя кароткія ролікі, якія атрымліваюць шмат пазітыўных рэакцый [прыклады глядзіце ніжэй]