Ва ўмовах вострага недахопу святароў прызначаны пробашчы парафій, дзе служылі польскія ксяндзы

Праз тры тыдні пасля развітання з пробашчамі ў Янаве і Івацэвічах – польскімі святарамі, якім не дазволілі ўлады працягваць служэнне ў Беларусі – у «асірацелыя» парафіі скіраваныя новыя святары.

Як даведаліся вернікі, пробашчам у Янаве, у санктуарыі святога Андрэя Баболі, прызначаны ксёндз Юрый Дрозд, які апошнія гады служыў вікарыем у Гомелі. Хто яго заменіць, яшчэ невядома вернікам – верагодна, вялікая гомельская супольнасць застанецца пакуль з адным святаром.

Парафію ў Івацэвічах, як мяркуецца, аддадуць ксяндзу Эдуарду Мажаеву, які служыць пробашчам у вёсцы Лясная Баранавіцкага раёна. Адтуль да Івацэвічаў яму давядзецца праязджаць каля 50 км у адзін бок.

Акрамя таго, пробашчам трэба акармляць яшчэ па дзве супольнасці ў іншых населеных пунктах. Пра прызначэнні пакуль не абвешчана афіцыйна.

У Пінскай дыяцэзіі, як паведамлялі яе біскупы, востры недахоп святароў. Некалькім ксяндзам даводзіцца служыць адразу ў 2-3 супольнасцях у аддаленых населеных пунктах.

Да гэтага ў Янаве і Івацэвічах, пасля таго, як парафіі вымушана пакінулі польскія святары, Імшы адпраўлялі толькі па нядзелях – як даведаліся вернікі, сюды прыязджалі пробашчы іншых парафій.

Наш канал в Telegram – только интересное и важное. Подписаться >