Толькі ў адной дыяцэзіі Беларусі католікам дазволілі не трымаць пятнічны пост 1 мая

Да канца дня 30 красавіка не з'явілася паведамленняў ад біскупаў Гродзенскай, Пінскай і Віцебскай дыяцэзій аб удзяленні дыспенсацыі (вызвалення) ад абавязку трымаць пятнічны пост 1 мая – як гэта зрабілі ў Мінска-Магілёўскай архідыяцэзіі.

У некаторых ранейшых выпадках практыку ўдзялення такой дыспенсацыі ў выходныя дні – свецкія дзяржаўныя святы – падтрымлівалі ў большасці дыяцэзій Беларусі і ўслед за Мітрапалітам Мінска-Магілёўскім таксама прымалі такія рашэнні.

Гэтым разам такога не адбылося. Толькі Апостальскі Адміністратар для грэка-католікаў у Беларусі архімандрыт Сяргей Гаек удзяліў дыспенсацыю ад абавязку устрымання ад спажывання мясных страваў грэка-католікам у Беларусі ў пятніцы 1 і 8 траўня.

Аднак, у адрозненні ад рашэння арцыбіскупа Юзафа Станеўскага, грэка-католікаў, якія будуць карыстацца гэтай дыспенсацыяй, абавязалі, не заахвоцілі, памаліцца ў інтэнцыях Святога Айца.

Цікава, што з той жа розніцай удзялілі дыспенсацыю і ў дыяцэзіях у Польшчы, дзе таксама Свята Працы – выходны дзень. Прычым, у некаторых выпадках гэта не абавязак малітвы, а матэрыяльны ўнёсак. Пры жаданні скарыстацца дыспенсацыяй вернікі некаторых польскіх дыяцэзій павінны скласці ахвяраванне на місійную дзейнасць альбо у адрас Карытас.

Наш канал в Telegram – только интересное и важное. Подписаться >