Надзея, маўчанне, малітва. Што цяпер са святарамі, якія хутка могуць пакінуць Беларусь

Каталіцкія вернікі Беларусі працягваюць непублічную малітву аб тым, каб улады змянілі рашэнне адносна польскіх святароў, якім не працягнулі дазвол на далейшае служэнне ў краіне.

Рэакцыі на гэта рашэнне так і не з'явілася – ні на афіцыйных рэсурсах Касцёла, ні на старонках парафій.

Нават быў выдалены допіс з Instagram парафіі ў Салігорску, пробашчу якой таксама не працягнулі дазвол. Нагадаем, там заклікалі пісаць звароты ў дзяржаўныя структуры, але праз суткі гэты допіс знік і больш парафія нічога не паведамляла.

Таксама маўчаннем суправаджаецца сітуацыя ў іншых парафіях, пробашчам якіх не працягнулі дазвол.

Ускосна праблему пацвердзіў Мітрапаліт Мінска-Магілёўскі ў інтэрв'ю Vatican News, адзначыўшы, што «святары з Польшчы, якія служылі дзесяцігоддзямі, усё часцей не атрымліваюць дазволу на далейшую працу».

Тым часам вернікі даведаліся некаторыя дэталі пра некалькіх святароў, якія ў хуткім часе могуць пакінуць Беларусь.

З краіны вымушаны былі выехаць двое святароў, што доўгія гады служылі ў Віцебскай дыяцэзіі, але трэці – кусташ санктуарыя ў Браславе ксёндз Станіслаў Мжыглуд [на фота] пакуль змог застацца. Гэта бачна на здымках з Першай Камуніі, якая адбылася 24 траўня. Як стала вядома шырокаму колу вернікам, святар атрымаў дазвол застацца ў Беларусі яшчэ на тры месяцы. Вернікі моляцца, каб гэты дазвол быў працягнуты.

Таксама з надзеяй і малітвай супольнасці чакаюць перагляду рашэння па іншым святарам, у тым ліку адносна пробашча ў Нарачы айца Паўла Леліто. Нядаўна падчас кангрэсу Рэгіянальнага вікарыяту ордэна кармэлітаў босых у Беларусі яго абралі настаяцелем кляштара ў Нарачы на наступнае трохгоддзе. Значыць, застаецца надзея, што святар зможа працягнуць служэнне ў Беларусі.

Відавочна, што вырашыць праблему касцёльныя ўлады спрабуюць «у цішыні», не афішуюць ні саму праблему, ні перамовы на гэты конт з дзяржаўнымі ўладамі.

Наш канал в Telegram – только интересное и важное. Подписаться >