З аўкцыёну прадалі карціну, каб адрамантаваць касцёл у Рэчыцы

Ідэю з правядзеннем дабрачыннага аўкцыёну, пра які мы распавядалі, удалося рэалізаваць. Нагадаем, каб знайсці грошы на рамонт каталіцкага храма Найсвяцейшай Тройцы ў Рэчыцы, парафіяне выставілі на электронныя таргі карціну.

У касцёле патрабуе рамонту сакрыстыя – тут яшчэ зімой прарвала трубу і заліло сцены. Парафія ў Рэчыцы невялікі, сродкі сабраць няпроста, таму вернікі вырашылі паспрабаваць прадаць нацюрморт мясцовай мастачкі Ніны Фяськовай.

Пакупніку абяцалі не толькі прыгожую карціну для дома, але і шчырую падзяку вернікаў, а таксама Божае благаславенне.

Як мы заўважылі, таргі адбыліся і карціну паспяхова прадалі. Праўда, без павышэння кошту, а па пачатковай цане лота – 250 рублёў.

Была зроблена адна стаўка, і нацюрморт сышоў пакупніку пад нікам Amatar. Мяркуючы па ягоным профілі, гэта калекцыянер, які ўжо шмат гадоў купляе розныя рэчы з аўкцыёнаў і мае добрую рэпутацыю.

Amatar падзякаваў прадаўцу за «выдатны нацюрморт па прывабным кошце» і пацікавіўся, ці хопіць грошай, атрыманых за карціну, каб зрабіць рамонт у храме? Яму адказалі, што канешне не хопіць, але яны дапамогуць пачаць працы і зрабіць «самае крытычнае».