Каталікі будуць трымаць пост і маліцца аб міры ў Сірыі

У сувязі з рэальнай пагрозай вайны ў Сірыі і нарастаючым міжнародным напружаннем Святы Айцец Францішак заклікаў усіх хрысціянаў і людзей добрай волі да посту і малітвы 7 верасня 2013 года - напярэдадні свята Нараджэння Найсвяцейшай Панны Марыі. У гомельскім касцёле малітва адбудзецца ў суботу, а пасціцца вернікі будуць у панядзелак, паколькі ў суботу адзначаецца парафіяльнае свята.

- Заклікаю ўсіх вернікаў сабрацца ў гэты дзень у касцёлах на супольную малітву і перад выстаўленым Найсвяцейшым Сакрамэнтам прачытаць Літанію да Найдаражэйшай Крыві Пана Езуса, а таксама памаліцца спевам суплікацыі «Святы Божа», - выступіў з афіцыйным паведамленнем біскуп Пінскі Антоні Дзям'янка. - Усіх, хто ў гэты дзень не будзе мець магчымасці прыйсці ў святыню на спецыяльнае набажэнства па прычыне хваробы, абавязковай працы або з-за іншых перашкодаў, заахвочваю самім выбраць адпаведную малітву і спосаб ахвяравання, каб уключыцца ў агульную малітву і пост Касцёла.

Як дадае біскуп, такім чынам, яднаючыся са Святым Айцом, сотнямі мільёнаў хрысціянаў і людзей добрай волі ва ўсім свеце, мясцовыя каталікі ўзнясуць маленне да Бога - Валадара Супакою, каб выпрасіць у Яго неабходныя ласкі для ўсталявання міру паміж народамі:

- Верым, што такі хрысціянскі акт малітвы і ахвяры дапаможа канфліктуючым бакам паўстрымацца ад насілля і кровапраліцця, забяспечыць мірную будучыню як для хрысціянаў, так і для ўсіх грамадстваў блізкаўсходняга рэгіёна і ўсяго свету.