Пробашча гомельскага касцёла айца Славаміра павіншавалі з Днём нараджэння [фота]

4 лістапада 2013 года пробашч гомельскай рыма-каталіцкай парафіі Нараджэння Божай Маці айцец Славамір Ласкоўскі адзначыў свой Дзень нараджэння - святару споўнілася 54 гады. Пасля святой Імшы парафіяне павіншавалі знакамітага і паважанага ў Гомелі пробашча са святам, уручылі кветкі і невялікія падарункі. А мясцовыя дзяўчыны-скаўткі спяклі для святара торт, да віншаванняў далучыліся і хлопцы-скаўты.

Айцец Славамір служыць у Гомелі ўжо больш за 20 гадоў. Ён прыняў пасвячэнне ад блаславёнага Папы Яна Паўла II, якога Каталіцкая царква хутка абвесціць святым. Убачыўшы сваё пакліканне ў тым, каб ехаць на Усход, на землі , якія дзесяткі гадоў жылі пад засіллем атэізму, малады святар прыбыў у Гомель у канцы 80-х. У той час тут не было ні храма, ні парафіі. Айцец Славамір доўга дамагаўся рэгістрацыі супольнасці і перадачы памяшкання майстэрні мастакоў - былой капліцы, каб пабудаваць на яе аснове касцёл.

Праз айца Славаміра, яго цяжкую працу Гасподзь адрадзіў ў гомельскім рэгіёне каталіцкія парафіі, а дзейнасць польскага святара па адраджэнні беларускай культуры, евангелізацыі, сацыяльным служэнні прынесла велізарны плён.

У свой Дзень нараджэння айцец Славамір правёў не толькі службу, але і заняткі ў «Школе веры», а пасля запрасіў усіх жадаючых на гарбату. Парафіяне пажадалі ксяндзу Божага дабраславення, радасці, здароўя, пастаяннага навяртання да Госпада, узрастання ў веры, а таксама стаць святым і шукаць Царства Нябеснае.

Чытайце таксама: Гомельскія каталікі павіншавалі пробашча з 25- годдзем пасвячэння >>>