Дамова паміж Беларуссю і Ватыканам не абмяркоўвалася. Топ-5 цытат Нунцыя

Апостальскі Нунцый у Беларусі арцыбіскуп Антэ Ёзіч сустрэўся 23 жніўня з Аляксандрам Лукашэнкам у сувязі з завяршэннем сваёй дыпламатычнай місіі ў краіне. Па выніках сустрэчы прадстаўнік Ватыкана заявіў, што «тэма падпісання канкардату паміж Беларуссю і Святым Пасадам не абмяркоўвалася, гэтае пытанне застаецца на будучыню».

Канкардат – пагадненне Ватыкана з дзяржавай, якое рэгулюе прававое становішча Рыма-каталіцкай царквы ў дадзенай дзяржаве і яе адносіны са Святым Пасадам. За такое юрыдычнае ўрэгуляванне адносін, якое б пашырыла магчымасці РКЦ у Беларусі, мясцовы епіскапат выступаў яшчэ ў 2017 годзе. З тых часоў тэма падымалася не аднойчы, казаў пра неабходнасць падпісання канкардату і папярэдні Апостальскі Нунцый.

Прыводзім іншыя ключавыя цытаты арцыбіскупа Антэ Ёзіча з яго заяваў дзяржаўнай прэсе пасля сустрэчы з Лукашэнкам.

«Я працаваў для вашага грамадства. Не толькі для католікаў, не толькі для нашай Царквы, а для ўсіх. І мне было вельмі прыемна».

«Тое, што я бачыў тут, – гэта прыклад і для Еўропы, і для ўсяго свету. Напрыклад, гэта важныя сямейныя і маральныя каштоўнасці, якія мы часам не бачым на Захадзе. Паглядзіце, якая сям'я на Захадзе і якая тут».

«Як народ тут моліцца ... Тут народ больш адчувае сваю веру, жыве і развіваецца. Ёсць цяжкасці, але людзі заўсёды глядзяць на самае важнае».

«Ваш народ – добры, мірны народ. Нягледзячы на ўсе цяжкасці, якія з'яўляюцца, людзі ідуць далей».

У афіцыйным паведамленні адзначаецца, што Лукашэнка падзякаваў Ёзічу «за дапамогу, аказаную пры вызваленні трыццаці беларускіх грамадзян пасля пачатку СВА ва Украіне». Пра што менавіта ідзе гаворка, не ўдакладняецца. Верагодна – аб дапамозе ў выездзе беларускіх кіроўцаў у першыя месяцы пасля ўварвання РФ ва Украіну.

Наш канал в Telegram – только интересное и важное. Подписаться >