Без званкоў і лістоў: што вядома пра ксяндза Акалатовіча, які пераведзены ў калонію

Ужо паўтара месяцы знаходзіцца ў калоніі асуджаны на 11 гадоў зняволення каталіцкі святар Генрых Акалатовіч. Былога пробашча парафіі ў Валожыне перавялі ў калонію ў Бабруйску проста на Вялікдзень, 20 красавіка.

З таго часу пра яго няма практычна ніякіх вестак. Але некаторая інфармацыя ўсё ж дайшла да вернікаў. Стала вядома, што 65-гадовага святара накіравалі ў атрад №4. Таму лісты яму можна адпраўляць па наступным адрасе:

Околотовичу Геннадию Владиславовичу
ИК №2, отряд №4
213807 ул. Сикорского, 1, Бобруйск
Могилевская область

За гэтыя паўтара месяцы лістоў ад святара амаль не было. У асяроддзі вернікаў вядома толькі пра адзін кароткі ліст, які дайшоў ад ксяндза. У ім ён прасіў выслаць лекі (ён мае цяжкія хваробы) і пісаў, што рады «несці крыж пакутніцтва за Бога, за веру, за Касцёл», паведамляў, што просіць Пана аб умацаванні ў веры, перадаваў усім падзяку.

Ніводнага тэлефоннага званка, які паложаны зняволеным, таксама пакуль не было, наколькі вядома вернікам.

Яны чакаюць прыезду ў Беларусь у чэрвені новага Апостальскага нунцыя з надзеяй, што той будзе весці перамовы аб вызваленні ксяндза Генрыха і другога асуджанага святара — айца Анджэя Юхневіча.

Наш канал в Telegram – только интересное и важное. Подписаться >