«Спадзяюся, што людзі, даведаўшыся пра гэта, умацуюцца ў веры». З'явілася вестка ад ксяндза Акалатовіча

Пасля таго, як два месяцы вернікі не атрымлівалі ніякіх вестак пра зняволенага беларускага каталіцкага святара Генрыха Акалатовіча, у пачатку кастрычніка пра яго зноў з'явілася свежая інфармацыя.

Як даведаліся вернікі, асуджаны на 11 гадоў ксёндз Генрых, які знаходзіцца ў калоніі ў Бабруйску, трымаецца ў добрым духу, часта трывае ў малітве, якая дапамагае яму супрацьстаяць спакусам:

«Сатана хоча аслабіць маю веру, пастаянна спакушае, спрабуе пераканаць, што ад мяне ўсе адвярнуліся і забыліся, што нібыта Касцёл, Папа Рымскі нічога не робяць, каб дапамагчы тым, хто нявінна асуджаны».

Але ў святара ёсць ружанец (пацеры для малітвы), і калі ён «перахрысціць Сатану ружанцам, той адразу перастае нападаць».

Святар адзначае, што ў зняволенні яму дапамагаюць таксама ўспаміны кардынала Казіміра Свёнтка, які правёў у савецкіх лагерах 10 гадоў, даваў прыклад мужнасці і стойкасці ў абароне веры, Бога, Каталіцкай царквы:

«Кардынал казаў: кожны на сваім месцы – пробачш, біскуп, кардынал – павінны смела абараняць Касцёл ад Сатаны і ягоных слуг. Ніколі нельга ісці на пагадненне з Сатаной. Ніколі не дапускайце, каб ён кіраваў святаром або біскупам. Жывіце ў капланскай камуніі, дапамагайце адзін аднаму...»

У цэлым, кожны дзень у зняволенні праходзіць аднолькава:

«Так дзень за днём: сядзіш, молішся, узгадваеш апавяданні кардынала Свёнтка і іншых святароў. Малітва, ружанец, успаміны кардынала аб барацьбе з Сатаной – усё гэта вельмі дапамагае перажываць гэтыя выпрабаванні, супрацьстаяць спакусам. Я спадзяюся, што людзі, даведаўшыся пра гэта, таксама ўмацуюцца ў веры».

Сам для сябе святар просіць аб тым, каб Бог умацаваў яго веру, каб ён не збочыў з Божага шляху.

Наш канал в Telegram – только интересное и важное. Подписаться >