У школе ў Гродзенскай вобласці «ўрок» да Дня роднай мовы правёў ксёндз

Люты 21, 2026
Written by KATOLIK.LIFE
Published in Соцыум
Add new comment

Святар сказаў школьнікам, што беларуская мова – гэта не толькі гук і літара, але і шлях да Бога.

У Варнянскай сярэдняй школе 21 лютага, у Міжнародны дзень роднай мовы, было багата мерапрыемстваў – суботні школьны дзень стаў насычаным для вучняў усіх класаў, ад малодшых да старэйшых.

У адной з сустрэч прыняў удзел пробашч каталіцкай парафіі ў Варнянах ксёндз Віктар Захарэўскі. Яго запрасілі стаць госцем моўнага квэсту «Ключы ад сэрца мовы» для вучняў 10-11 класаў.

Святар сказаў школьнікам, што беларуская мова – гэта не толькі гук і літара, але і шлях да Бога, калі вымаўляць яе з любоўю. Што адно кароткае «трымайся», сказанае па-беларуску, можа стаць сапраўднай малітвай за таго, хто побач. Што слова, народжанае ў сэрцы, здольнае суцешыць мацней, чым доўгія прамовы.

«Няхай вашы словы заўжды нясуць святло», – пажадаў святар. Калі слова асвечана любоўю, яно становіцца святлом, якое вядзе, лечыць і аб’ядноўвае, адзначылі ў парафіі.

Фота – з Instagram варнянскай школы і парафіі.