Нават сельсавет і пажарны пост – святар з маленькага мястэчка наведаў з «калядой» 9 дзяржаўных устаноў

Пробашч каталіцкай парафіі Святога Юрыя ў Варнянах Астравецкага раёну ксёндз Віктар Захарэўскі падвёў вынікі калядных душпастырскіх візітаў. Святар падзякаваў парафіянам за «нязломнае духоўнае жыццё, сумесныя малітвы, шчырыя размовы, падтрымку» і адзначыў, што наведваў з «калядой» не толькі дамы вернікаў, але і дзяржаўныя ўстановы.

Святара запрасілі для супольнай малітвы і благаслаўлення памяшкання Варнянскі сельскі савет, школа-сад, сацыяльна-педагагічны цэнтр, Варонскі ФАП, амбулаторыя, аптэка, пост аддзела па надзвычайных сітуацыях у Варнянах, дзіцячая школа мастацтваў, бібліятэка-клуб, а таксама 5 прыватных крамаў.

Святар падзякаваў усім за запрашэнні:

«Вельмі цешуся, што вы імкнецеся на сваіх месцах працы жыць з Богам і дзеля Яго праслаўлення. Ваша падтрымка і супрацоўніцтва дазволілі ажыццявіць душпастырскія візіты на належным узроўні».

Мы знайшлі падзяку і ў адрас самога ксяндза Віктара – ад сацыяльна-педагагічнага цэнтра, выхаванцам якога ён падарыў салодкія падарункі і абразкі. Ва ўстанове адзначылі, што дзеці з прытулку ўжо не раз наведвалі касцёл.

Варняны знаходзяцца ля мяжы з Літвой – гэта гістарычная Віленшчына, таму тут такі вялікі працэнт католікаў, што нетыпова ў цэлым для Беларусі.

Наш канал в Telegram – только интересное и важное. Подписаться >