У Мінску прэзентавалі план «Залатой Горкі» са скверам на могілках, якога там быць не можа

Нягледзячы на грамадскі рэзананс, адміністрацыя Савецкага раёна Мінска 28 лютага прэзентавала праект рэканструкцыі квартала «Залатая Горка», які не адпавядае рэчаіснасці.

Мы разгледзелі прадстаўлены план і прыводзім скрыншот: участак, дзе ў рэальнасці цяпер ідзе маштабная будоўля, пазначаны як азелянёная тэрыторыя агульнага карыстання. На самай справе яшчэ летась там выдалілі больш за 140 дрэў і вырылі велізарны катлаван. Гэта частка былых каталіцкіх Залатагорскіх могілак ля касцёла святога Роха.

Як мы паведамлялі, праект прадугледжвае стварэнне там сквера плошчай 1,65 га. Але гэта ўжо немагчыма – гэты ўчастак (у тым ліку тэрыторыя, раней перададзеная каталіцкай парафіі) у 2025 годзе быў аддадзены пад будаўніцтва сакрэтнага будынка.

Гэтыя змены не ўнеслі ў план, складзены ў 2023 годзе, прэзентавалі праект і запрасілі да грамадскага абмеркавання, як быццам будоўлі на месцы могілак няма. Але яна добра бачная не толькі мясцовым жыхарам, але і на спадарожнікавых здымках.

Перад пачаткам гэтага будаўніцтва адміністрацыя раёна інфармавала, што будуць выдаленыя 144 дрэвы і каля 1 га травянога покрыва.

Відавочна, што сквер там ужо ніяк не з'явіцца, прынамсі, заяўленай плошчы. Для параўнання – участак касцёла, выдзелены на схеме, складае 0,35 га.

Дарэчы, на плане пазначаная пад знос і глушылка, якая ўжо была знесеная дзеля будаўніцтва.

Нагадаем, вернікі чакаюць, што парафіі перададуць для перапахавання парэшткі людзей, паднятыя з зямлі пры рыцці катлавана на месцы былых Залатагорскіх могілак.

Наш канал в Telegram – только интересное и важное. Подписаться >