МУС адказала Касцёлу: лічыце вернікаў самі

Міністэрства ўнутраных спраў Беларусі размясціла на сваім сайце афіцыйны адказ на адкрыты ліст арцыбіскупа Тадэвуша Кандрусевіча. Нагадаем, каталіцкі іерарх выказаў занепакоенасць тым, што ў зводках МУС істотна заніжаецца колькасць вернікаў, якія прымаюць удзел у Велікодных і Калядных набажэнствах у касцёлах. Па апошняй інфармацыі міліцыі, у ноч Божага Нараджэння храмы наведалі 40 тысяч чалавек, і гэтая лічба з'яўляецца занадта заніжанай.

МУС адказала, што па іх дадзеных, у Калядных набажэнствах 24-25 снежня 2017 года на тэрыторыі Беларусі прыняло ўдзел больш за 113 тысячаў чалавек. А «размешчаная на сайце МУС інфармацыя тычылася выключна начных набажэнстваў у храмах». Пры гэтым, адкуль у зводках узялася лічба ў 40 тысяч - не ўдакладняецца, а бо да яе і былі прэтэнзіі, паколькі нават толькі для начных службаў 40 тысяч - гэта заніжаная лічба.

- Для МУС колькасць грамадзян, якія прымаюць удзел у масавых мерапрыемствах, мае значэнне выключна з пазіцыі расстаноўкі неабходнай колькасці сіл і сродкаў. Наша галоўная задача - забеспячэнне грамадскай бяспекі, - заявілі ў МУС. - Інфармацыя, якая размяшчаецца ў раздзеле «Зводка», ня носіць афіцыйнага характару і, як правіла, патрабуе дадатковых ўдакладненняў.

Каб у далейшым не ўзнікалі непаразуменні, МУС вырашыла наогул не публікаваць дадзеныя аб колькасцi ўдзельнiкаў набажэнстваў: «Дадзеныя будуць выкарыстоўвацца выключна ў службовых мэтах без размяшчэння ў адкрытым доступе». А распаўсюджваць iнфармацыю аб колькасцi вернікаў МУС прапанавала самой Рымска-каталіцкай царкве.