Беларускі храм у Лондане ўдзельнічае ў міжнародным конкурсе «Будынак году»

Вядомы беларускі драўляны храм у брытанскай сталіцы уключаны ў спіс намінантаў на званне «Будынак году». Невялікая грэка-каталіцкая царква святога Кірылы Тураўскага і Усіх святых заступнікаў беларускага народа ўдзельнічае ў міжнародным конкурсе самых унікальных будынкаў у свеце, збудаваных ў 2016 годзе.

Галасаванне праводзіцца на спецыялізаваным сайце ArchDaily.com, усяго ў конкурсе ўдзельнічаюць 3,5 тыс. збудаванняў. Каб прагаласаваць за лепшы будынак года, неабходна зарэгістравацца на сайце і аддаць свой голас.

Нагадаем, раней ўніяцкі беларускі храм у Лондане заваяваў прыз глядацкіх сімпатый конкурсу New London Architecture.

Чытайце таксама: Беларуская царква ў Лондане атрымала прэстыжную архітэктурную прэмію >>>

Царква ў гонар святаначальніка Кірылы, біскупа Тураўскага, і ўсіх святых заступнікаў беларускага народа была асвечаная ў Лондане 17 снежня па адрасе Marian House, Holden Avenue, London N12 8HY. Бліжэйшая станцыя метро - Woodside Park. Гэта адзіная ў замежжы адмыслова пабудаваная беларуская грэка-каталіцкая царква і першая драўляная царква ў Лондане ад часоў Вялікага пажару (1666 год). Збудаваная на 30-я ўгодкі Чарнобыля, яна таксама стала храмам-помнікам усім ягоным ахвярам.

Камень, які стаў краевугольным у падмурку новага храма, быў прывезены са старадаўняга Траецкага касцёла ў беларускай вёсцы Друя, аднаго з цэнтраў адраджэння нацыянальнай Царквы.

Спраектаваў невялікі драўляны храм лонданскі архітэктар кітайскага паходжання Цзывай Рафаэль Со, які з'яўляецца вернікам беларускай грэка-каталіцкай царквы, што існуе ў Лондане ўжо каля 70 гадоў.

У праекце сінтэзаваны тыпы сучаснай архітэктуры і традыцыйнай архітэктуры беларускіх храмаў Усходняга хрысціянства.