Першую беларускую царкву ў замежжы пабудавалі ў Лондане

Новазбудаваная царква ў гонар святаначальніка Кірылы, біскупа Тураўскага, і ўсіх святых заступнікаў беларускага народа будзе асвечаная ў Лондане 17 снежня. Урачыстаць адбудзецца ў 10.30 па адрасе Marian House, Holden Avenue, London N12 8HY. Бліжэйшая станцыя метро - Woodside Park.

Гэта адзіная ў замежжы адмыслова пабудаваная беларуская грэка-каталіцкая царква і першая драўляная царква ў Лондане ад часоў Вялікага пажару (1666 год).

Збудаваная на 30-я ўгодкі Чарнобыля, яна таксама будзе храмам-помнікам усім ягоным ахвярам, гаворыцца на старонцы падзеі ў Facebook.

Пасля Боскай Літургіі адбудзецца выступленне дырэктара Дабрачыннага фонду «Сакавік» Марыі Міцкевіч, прысвечанае дзейнасці Беларускай місіі і яе рэктара а. Аляксандра Надсана ў галіне дапамогі ахвярам Чарнобыля ў канцы 1980-х – пачатку 1990-х.

Урачыстасць завершыцца прыёмам ў Марыян Хаўз.

Нагадаем, 7 лютага 2016 года ў Лондане быў асвечаны краевугольны камень беларускай грэка-каталіцкай (уніяцкай) царквы святога Кірылы Тураўскага і Усіх святых заступнікаў беларускага народа.