«Мала храмаў і святароў». Мітрапаліт Кандрусевіч распавёў аб праблемах католікаў у Беларусі
- Written by Katolik.life
- Published in Царква
- Add new comment
У краіне шмат абортаў, моладзь з'язджае за мяжу
Старшыня Канферэнцыі Каталіцкіх Біскупаў у Беларусі, арцыбіскуп Тадэвуш Кандрусевіч стаў госцем у студыі «Радыё Марыя» ў Расіі. У гэтыя дні беларускі іерарх наведвае Санкт-Пецярбург - з гэтым горадам цесна звязана служэнне Тадэвуша Кандрусевіча, які адзначае 30-годдзе свайго біскупскага пасвячэння.
У прамым эфіры Мітрапаліт Мінска-Магілёўскі дзяліўся ўспамінамі аб пачатку свайго служэння, прымаў тэлефонныя званкі, распавядаў аб праблемах, якія найбольш актуальныя цяпер для католікаў у Беларусі.
Тадэвуш Кандрусевіч адзначыў, што ў Беларусі мала каталіцкіх храмаў - у Мінску і ў іншых вялікіх гарадах, таму многім вернікам цяжка дабірацца на службу з аддаленых раёнаў.
Акрамя таго, не хапае святароў. Зараз у Беларусі служыць каля 500 каталіцкіх святароў, у асноўным, прыкладна 420 - мясцовыя, а астатнія пераважна прыехалі з Польшчы. Ім цяжкасці стварае заканадаўства аб замежных грамадзянах, якіх могуць высылаць з краіны за нязначныя адміністрацыйныя правапарушэнні.
Яшчэ адна праблема - адсутнасць пагаднення паміж Беларуссю і Ватыканам, што пазбаўляе магчымасці служэння ў навучальных установах, супрацоўніцтва з рознымі ведамствамі. Ёсць таксама ідэя падпісаць такое пагадненне паміж дзяржавай і Канферэнцыяй каталіцкіх біскупаў у Беларусі, аднак яна таксама пакуль не рэалізаваная. У той жа час улады шмат у чым ідуць католікам насустрач, адзначыў арцыбіскуп.
Тадэвуш Кандрусевіч са шкадаваннем гаварыў і пра тое, што з Беларусі часта з'язджае таленавітая моладзь - на вучобу, на працу, і потым не вяртаецца ў краіну. Таксама гаворка ішла аб дэмаграфічных праблемах, аб вялікай колькасці абортаў.
Адказваючы на адно з тэлефанаванняў, кіраўнік Канферэнцыі каталіцкіх біскупаў распавёў, што Касцёл многае робіць для адраджэння беларускай мовы.
«Вядома, у першую чаргу наша задача - душпастырства людзей, але мы ствараем беларускі Касцёл - перакладзены ўсе літургічныя кнігі на беларускую мову, аператыўна перакладаюцца папскія энцыклікі, розныя дакументы, выдадзены Новы Запавет на беларускай мове. Гэта ўклад у развіццё беларускай культуры», - падкрэсліў Тадэвуш Кандрусевіч.
Media
Related items
- Адпраўка ў войска ў Беларусі адбываецца з удзелам святароў
- Пацалунак пад абразом і цягнік з адным вагонам – чым дзеліцца парафія ў глыбінцы
- «У парафіі 15-20 асоб». Мітрапаліт абвясціў акцыю па падтрымцы Касцёла на Магілёўшчыне
- Беларусы даказваюць у судах «польскія карані» – з дапамогай веры
- На «гучныя» службы ў касцёле паскардзіўся жыхар Смаргоні. Што яму адказалі?