Святара з Шуміліна не выпусцілі на волю і судзілі паўторна

UPD: айца Паўла адпусцілі, ён вызвалены. Пра гэта стала вядома ўвечары 22 траўня.

Айцец Павел Лемех, які служыць у каталіцкім санктуарыі ў Шуміліне і быў асуджаны на 10 сутак арышту, не выйшаў на волю па заканчэнні гэтага тэрміну, а 21 траўня яго судзілі паўторна па новым абвінавачванні.

Калі святара не вызвалілі ў суботу, вернікі зразумелі, што яго перазатрымалі паводле новага абвінавачвання і чакалі суда ў панядзелак. Аднак, мяркуючы па ўсім, працэс адбыўся ў аўторак. У ізалятары часовага ўтрымання ў Віцебску, дзе з 8 траўня знаходзіцца святар, удзень 21 траўня адказвалі, што «на гэты момант ён адсутнічае», адмовіўшыся растлумачыць, з якой прычыны. Відавочна, у той час над ім ішоў новы суд. Увечары ў ізалятары таксама адмовіліся паведаміць, ці знаходзіцца тут айцец Павел.

Рашэнне другога суда, як і сутнасць абвінавачванняў, пакуль невядомыя. У электронным раскладзе судоў працэс не быў указаны.

Нагадаем, айца Паўла затрымалі разам з іншым святаром – айцом Анджэем Юхневічам, які таксама служыць у Шуміліне. Айцу Анджэю прысудзілі 15 сутак арышту – гэты тэрмін заканчваецца 23 траўня. Акрамя таго, судзілі адну з парафіянак – за падпіску ў сацсетцы на старонку, абвешчанай «экстрэмісцкай», яе пакаралі штрафам.

Раней грэка-каталіцкага святара з Полацку трымалі ў зняволеньні 45 сутак – яго таксама судзілі некалькі разоў.

Наш канал в Telegram – только интересное и важное. Подписаться >